Индонезиянинг Сурабай шаҳрида содир этилган портлаш ташкилотчилари январь ойида қамоқхонадаги мамлакатнинг энг хавфли икки террорчиси билан учрашган. Бу ҳақда «ТАСС» хабар берди.
Черков ва полиция атрофида портлаш содир этган уч нафар эркак Жануби-Шарқий Осиёдаги энг йирик экстремистик гуруҳ — «Жамаа Исломия» етакчиси, узоқ муддатли қамоқ жазосига маҳкум қилинган Абу Бакар Башир билан кўришган. «Жамаа Исломия» гуруҳи энг йирик терактлардан бирини содир этган. 2002 йили Бали оролида содир этилган теракт оқибатида 202 киши ҳалок бўлган, улардан 164 нафари хориж фуқаролари эди. 200 дан ортиқ киши жароҳат олган.
Абу Бакар Башир билан кўришган 3 нафар террорчи кейинги куни Шарқий Ява вилояти Депок шаҳридаги тергов изоляторида сақланётган радикал исломнинг тарғиботчиси Омон Абдураҳмон билан учрашган. У ИШИДнинг Индонезиядаги асосий эмиссари, шунингдек, «Жамаа аншарут даулах» маҳаллий экстремистик гуруҳининг етакчиси ҳисобланади.
Индонезия ҳукуматининг 2016 йили қамоқхоналардаги энг хавфли террорчилар борасида қабул қилган қарорига қарамасдан, Абу Бакар Башир ва Омон Абдураҳмонга нисбатан кучайтирилган қўриқлаш тартиби жорий қилинмаган. Мамлакат қонунчилигига асосан, хавфли маҳбуслар бир кишилик камераларда сақланиши ва ҳеч кимга улар билан кўришиш рухсат берилмаслиги шарт
Катталиги бўйича мамлакатда иккинчи ўринда турадиган Сурабай шаҳрида 13 май, якшанба ва 14 май, душанба кунлари портлашлар содир этилган. Натижада тинч аҳолидан 15 киши, террорчи худкушлардан 13 киши ҳалок бўлган. 50 дан ортиқ киши жароҳат олган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)