Indoneziyaning Surabay shahrida sodir etilgan portlash tashkilotchilari yanvar oyida qamoqxonadagi mamlakatning eng xavfli ikki terrorchisi bilan uchrashgan. Bu haqda “TASS” xabar berdi.
Cherkov va politsiya atrofida portlash sodir etgan uch nafar erkak Janubi-Sharqiy Osiyodagi eng yirik ekstremistik guruh — “Jamaa Islomiya” yetakchisi, uzoq muddatli qamoq jazosiga mahkum qilingan Abu Bakar Bashir bilan ko‘rishgan. “Jamaa Islomiya” guruhi eng yirik teraktlardan birini sodir etgan. 2002-yili Bali orolida sodir etilgan terakt oqibatida 202 kishi halok bo‘lgan, ulardan 164 nafari xorij fuqarolari edi. 200 dan ortiq kishi jarohat olgan.
Abu Bakar Bashir bilan ko‘rishgan 3 nafar terrorchi keyingi kuni Sharqiy Yava viloyati Depok shahridagi tergov izolyatorida saqlanyotgan radikal islomning targ‘ibotchisi Omon Abdurahmon bilan uchrashgan. U IShIDning Indoneziyadagi asosiy emissari, shuningdek, “Jamaa ansharut daulax” mahalliy ekstremistik guruhining yetakchisi hisoblanadi.
Indoneziya hukumatining 2016-yili qamoqxonalardagi eng xavfli terrorchilar borasida qabul qilgan qaroriga qaramasdan, Abu Bakar Bashir va Omon Abdurahmonga nisbatan kuchaytirilgan qo‘riqlash tartibi joriy qilinmagan. Mamlakat qonunchiligiga asosan, xavfli mahbuslar bir kishilik kameralarda saqlanishi va hech kimga ular bilan ko‘rishish ruxsat berilmasligi shart
Kattaligi bo‘yicha mamlakatda ikkinchi o‘rinda turadigan Surabay shahrida 13-may, yakshanba va 14-may, dushanba kunlari portlashlar sodir etilgan. Natijada tinch aholidan 15 kishi, terrorchi xudkushlardan 13 kishi halok bo‘lgan. 50 dan ortiq kishi jarohat olgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)