Бразилиянинг Рио-де-Жанейро шаҳрида Марсио Матолиас исмли эркак 22 йилдан буён пляжда қумдан ясалган қасрда яшайди, деб ёзади «Вести.ru». Матолиас эски китобларни сотиб кун кечиради, ювиниш учун эса йўлнинг нариги томонида жойлашган ўт ўчириш бўлимига боради.
Бразилиялик ўз қасрини қуришда меъморлар Антонио Гауди ва Оскар Нимейернинг ишларидан илҳомланганини айтди. Дастлаб Матолиас қум қасрдан китоблар савдоси учун фойдаланмоқчи бўлган, аммо кейинроқ иморатни мустаҳкамлаб, у ерга ўзи ҳам кўчиб ўтган.
Маҳаллий аҳоли орасида «қирол» номи билан машҳур бўлган эркак вақтини китоб ўқиш ва ўз бошпанасини мустаҳкамлаш билан ўтказади. У якка яшаш ўзига ёқишини, аммо баъзан ўзини жуда ёлғиз ҳис қилишини айтди.
Изоҳ (0)