АҚШнинг ядровий битимдан чиқиши нефть нархининг ошишига олиб келмоқда

9 май куни Лондондаги ICE биржалари савдо вақтида Brent маркасидаги нефть нархининг бир баррели 77 долларни ташкил этди. Бу 2014 йилнинг ноябридан буён қайд этилган илк кўрсаткичдир, деб хабар беради «Nur.kz».

9 май куни бир баррель нефть нархи 77,17 долларни ташкил этган, соат 10:29 да эса 76,99 га тушган. Бу эса савдолар бошланганидан 2,78 фоизга кўп демакдир. Шунингдек, Техаснинг WTI нефти ҳам қимматлашмоқда: июль ойида етказиб бериш фьючерслик шартномалари 71,11 долларга тенг бўлган. Кейинроқ эса WTI нархи 70,94 долларга қадар тушган (бу саводлар очилганидан буён 2,65 фоизга ўсганини билдиради).

Нефть нархининг ошиши АҚШнинг Эрон билан ядровий битимдан чиқиши фонида кузатилмоқда.

Эслатиб ўтамиз, АҚШ президент Дональд Трамп 8 май куни Вашингтон ядровий битимлардан чиқишини ва Эронга қарши яна иқтисодий санкцияларни жорий этишини маълум қилганди. Оқ уй раҳбари ўзининг талабларига жавоб берадиган янги шартнома устида ишлашга ваъда қилди ва Эрондан Яқин Шарқдаги баллистик дастури ва фаолиятдан воз кечишни талаб қилди.