Фото: Самарқандда Хотира ва қадрлаш куни кенг нишонланди

Хотира ва қадрлаш куни байрам тадбирлари Самарқанд вилоятида кенг халқ оммаси иштирокида муносиб нишонланди. Бу ҳақда ЎзА хабар бермоқда.

Маълумотларга кўра, Иккинчи жаҳон урушида 152 мингдан кўпроқ самарқандликлар иштирок этган. Уларнинг 73 минг нафарига она-юртига қайтиб келиш насиб этмади. Самарқанд шаҳридаги Хотира майдонида 48 минг 500 нафардан ортиқ шаҳид кетганларнинг номлари битилган.

9 май куни эрта тонгдан Самарқанд шаҳридаги Хотира майдони ҳар қачонгидан гавжум бўлди. Бу ерга Самарқанд вилояти ҳокимлиги, Марказий ҳарбий округ қўмондонлиги, ҳуқуқ-тартибот идоралари, давлат ва жамоат ташкилотлари раҳбарлари, Иккинчи жаҳон уруши қатнашчилари ва меҳнат фахрийлари, ёшлар, кенг жамоатчилик вакиллари жам бўлди.

Самарқанд вилояти ҳокими Т. Жўраев бошчилигида Мотамсаро она ҳайкали пойига гул қўйилиб, бугунги тинч ва осуда кунлар учун жон фидо қилган юртдошлар ёд этилди.

Тадбир давомида уруш ва меҳнат фахрийлари бир-бирлари билан дийдорлашиб, ёшлик йилларини эслади, бугунги кунлар учун шукрона айтиб, ёшларни тинчлик-осойишталик қадрига етиб яшашга даъват этди.

Тадбирлар доирасида Самарқанд шаҳрининг Регистон майдонидан Университет хиёбонигача бўлган масофада ёшлар ва фахрийлар иштирокида марафон ҳамда веломарафон ўтказилди.

Тадбирлар якунида Иккинчи жаҳон уруши қатнашчилари ва меҳнат фахрийлари учун Самарқанд вилояти ҳокимлигининг тантанали қабул маросими уюштирилиб, иштирокчиларга совғалар топширилди.