Бухоро вилояти Вобкент туманида «Фуқаролар давлат органларига эмас, давлат органлари фуқароларга хизмат қилади» шиори остида ҳуқуқий ахборот кунлари ўтказилди. Бу ҳақда ЎзА хабар берди.

Фуқаролар дарду ташвишлари, уларни қийнаётган муаммоларни ўрганиш ва ҳал этиш, кишилар билан ҳамнафас бўлиш, қабул қилинаётган қонунларни халқчил, яъни оддий тилда тушунтириш мақсади кўзланган ушбу уч кунлик тадбир Ўзбекистон Республикаси Адлия вазирлиги ташаббуси билан ташкил этилди.

Адлия, прокуратура, Мажбурий ижро бюроси, солиқ, ички ишлар ва бошқа идоралар вакилларидан иборат 10 та ишчи гуруҳи аъзолари дастлабки икки кун давомида тумандаги тўрт мингдан зиёд аҳоли билан юзма-юз мулоқот ўтказди. Мулоқотларда қонунлар, уларга киритилаётган ўзгартиришлар ва амалга оширилаётган ислоҳотлар, фуқароларнинг ҳақ-ҳуқуқлари, бу ҳуқуқлардан фойдаланишнинг қонуний тартиблари ҳақида маълумотлар берилди.

Тадбирда давлат хизматлари кўрсатишда «фуқаролар эмас, ҳужжатлар ҳаракатланади» деган тамойил устуворлиги намоён бўлди. Масалан, нотариал идоралари нотариуслари томонидан фуқаролар хонадонларида 34 та сайёр нотариал ҳаракатлари қайд этилди. Давлат хизматлари марказлари эса 174 та сайёр давлат хизматлари кўрсатди, ФҲДЁ бўлими ходимлари эса 30 га яқин ҳаракатларни амалга оширди.

Фуқаролик, жиноий ва маъмурий ишлар бўйича туман судлари томонидан жойларда сайёр тартибда 17 та суд мажлиси ўтказилиши ошкоралик ва тарбиявий нуқтаи назаридан аҳамиятга эга.

Адвокатлар демократик тамойилга амал қилиб, бевосита маҳаллада фуқароларга уларнинг муаммоли масалалари юзасидан тегишли судларга 24 та даъво аризаси тайёрлаб бериш баробарида 200 дан ортиқ фуқаро ва тадбиркорлик субъектига бепул ҳуқуқий ёрдам ва маслаҳатлар кўрсатди.