Ўзбекистоннинг Париждаги элчихонасида Францияда истиқомат қилаётган ўзбек ватандошлар билан учрашув бўлиб ўтди. Суҳбат чоғида ватандошларга Ўзбекистондаги янгиланишлар, ижтимоий-иқтисодий ва маданий-маърифий соҳалардаги ислоҳотлар, оддий одамлар ҳаётида рўй бераётган ўзгаришлар ҳақида сўзлаб берилди. Бу ҳақда ЎзА хабар қилди.
Мамлакатда тадбиркорлар учун яратилаётган шароитлар, хорижлик инвесторларга берилаётган имкониятлар, халқ билан йўлга қўйилган бевосита мулоқот, инсон шаъни ва манфаатларини ҳимоя қилиш йўлида қонунчиликка киритилаётган ўзгаришлар хорижда яшаб, меҳнат қилаётган юртдошларнинг эътиборини тортди.
Таъкидлаш керакки, Франциядаги ватандошлар орасида Societe Generale, Yves Rocher, Schneider Electric каби нуфузли компания ва ташкилотларда меҳнат қилаётган, Сорбонна, Тиллар ва цивилизациялар миллий институти сингари дунёнинг етакчи таълим муассасаларида таҳсил олаётган юртдошлар Ўзбекистондан келадиган ҳар бир янгиликни катта хурсандчилик ва қувонч билан қабул қилади, дейилади ЎзА хабарида.
Иштирокчиларда Тошкент шаҳрининг қадимий маданий маркази — Хастимом мажмуаси ёнида барпо этилаётган Ислом цивилизацияси маркази катта қизиқиш уйғотди. Ўзбекистондаги диний-маърифий соҳадаги ислоҳотлар, қўшни мамлакатлар ва жаҳон ҳамжамияти билан манфаатли ҳамкорлик, сайёҳликни ривожлантириш йўлидаги ташаббуслар нафақат юртдошлар, балки хорижлик экспертларнинг ҳам диққат марказида тургани қайд этилди.
Изоҳ (0)