Хитойнинг Хэбэй провинцияси Уань шаҳри ҳукумати 118 нафар болани асраб олиш учун миллионлаб юань пул сарфлаб, бутун мамлакатга танилган аёлни жиноятда гумон қилиб ҳибсга олди ва унинг хусусий болалар уйини ёпиш ҳақида қарор чиқарди, деб ёзади «РИА Новости» маҳаллий ОАВларга таяниб.
1996 йилдан болаларни асраб олишни бошлаган ва 2007 йилда «Меҳр-муҳаббат қишлоғи» деб номланган хусусий етимхонасини очган аёлнинг фаолияти матбуотда кенг ёритилган, шу туфайли у машҳур бўлиб кетган.
Шундан кейин аёл хайриядан шахсий манфаатлари йўлида фойдаланишга ўтган. У асраб олинган болалардан маҳаллий мансабдорларга таҳдид қилиш ва уларни қўрқитишда фойдаланганликда айбланмоқда.
Ҳукумат маълумотларига кўра, етимхонадаги баъзи болаларнинг ота-онаси бўлган, ҳукуматни алдаб, давлатдан субсидия олиш учун уларнинг номларидан фойдаланилган.
Бундан ташқари, болалар уйида ўғирлаб кетилган болалар ҳам бўлиши мумкинлиги ҳақида хабарлар пайдо бўлди. Полиция болаларнинг қон намуналари ва бармоқ изларини олиб, текширув ўтказмоқда.
Изоҳ (0)