Бразилия ташқи ишлар вазирлиги мамлакат Исроилга қарши Халқаро жиноий судга киритилган даъво ишига расман қўшилишга тайёргарлик кўраётганини билдирди. Мазкур ариза Жанубий Африка Республикаси томонидан 2023 йилда киритилган эди.
Мамлакат яҳудий давлатини 1948 йилги Геноцид конвенциясини бузишда айблаб судга мурожаат қилган. Унда Исроил армиясининг Ғазодаги ҳарбий амалиётлари тинч аҳолига нисбатан кенг кўламли ҳужум экани айтилган, хусусан мактаблар, шифохоналар, лагерлар ва бошпаналар қасддан нишонга олингани таъкидлаган эди.
Исроилга қарши мазкур даъво ишига қўшилиш ниятини аввалроқ Испания, Туркия ва Колумбия ҳам маълум қилган. Бразилия ҳукумати томонидан эълон қилинган баёнотда Исроил халқаро ҳуқуқ нормаларини бузаётгани қайд этилган. Қолаверса, Ғазода тинч аҳолига қарши зўравонлик ҳолатларидан “чуқур норозилик” билдирилган.
Тель-Авив эса бундай айбловларни рад этиб, унинг мақсади ҲАМАС ҳаракатини йўқ қилиш билан чекланишини иддао қилган. Исроилнинг Бразилиядаги элчихонаси масала юзасидан изоҳ бермади. Бразилия—Яҳудий миллий ассоциацияси эса қарорни “Исроил билан узоқ йиллик дўстликни бузувчи ва ташқи сиёсатдаги экстремизмни кўрсатувчи нотўғри қадам” деб атади.
Президент Лула да Сильва Исроилнинг Ғазодаги амалиётларини узоқ вақтдан бери танқид қилиб келади. Бу қарор, айниқса, АҚШ билан муносабатлар кескинлашган бир пайтда эълон қилинди. Президент Дональд Трамп шу ой Бразилия маҳсулотларига 50 фоизлик бож жорий этганини билдирган эди.
АҚШ Жанубий Африканинг Исроилга қарши даъвосини собиқ президент Байден даврида ҳам қўллаб-қувватламаган. Амалдаги президент эса Оқ уйга қайтганидан бир ой ўтиб Жанубий Африка Республикасига молиявий ёрдамни қисқартириш бўйича фармон имзолаган.
Изоҳ (0)