Тўрт кунлик иш ҳафтаси жорий қилинса, ходимлар руҳий саломатлиги яхшиланади ва компаниялар даромади ошади — тадқиқот

Халқаро социологлар гуруҳи томонидан ўтказилган кенг қамровли тадқиқот хулосасига кўра, тўрт кунлик иш ҳафтасига ўтган компанияларда иш унумдорлиги ошади, ходимлар саломатлиги яхшиланади ва даромад ҳажми ҳам ошади, деб ёзади “Правила жизни”. Тадқиқот натижалари Nature Human Behavior журналида чоп этилган.

Тажриба 4 Day Week Global нотижорат ташкилоти томонидан ўтказилган бўлиб, унда АҚШ, Буюк Британия, Канада, Австралия ва Ирландиядан жами 140 дан ортиқ компания иштирок этган. Улар олти ой давомида ходимларини ҳафтасига 40 эмас, 32 соат ишлашга ўтказган, уларнинг иш ҳақи эса ўзгартирилмай қолдирилган.

Дастлабки икки босқичда 33 га яқин компания иштирок этди. Тадқиқот тугагач, компанияларнинг бирорта ходими тўрт кунлик иш ҳафтасидан воз кечишни истамади. Корхоналар фаолиятида эса иш унумдорлиги ошгани ва даромад миқдори кўпайгани қайд этилди. Бу орада ходимлар стресс, чарчоқ ҳолатларининг камайганини ва соғлиғи яхшиланганини айтди.

Дастлаб тўрт кунлик иш ҳафтасига ўтишнинг илк кунларида ходимлар вазифалари бир оз кўпайди, аммо бунга жавобан кўплаб компаниялар ортиқча йиғилишлардан воз кечиб, ўрнига телефон қўнғироқлари ва мессенжерлар ёзишмалари орқали кўплаб масалаларни ҳал қила олди.

Қўшимча дам олиш кунларини эса ходимлар оила, шахсий юмушлар, тиббий кўриклар, уй ишлари ёки севимли машғулотларига бағишлади. Бундай тартиб иш ва ҳаёт мувозанатини яхшилашга, стресс ва чарчоқни камайтиришга туртки бўлган.

Мазкур тадқиқот меҳнат бозорида барқарор ва самарали иш тизимини йўлга қўйишда муҳим омил сифатида баҳоланмоқда.