Алишер Тўхтаев Ўзбекистоннинг Шри Ланкадаги (қароргоҳи Исломобод шаҳрида жойлашган) биринчи элчиси этиб тайинланди. Бу ҳақда 24 июль куни “Дунё” ахборот агентлиги хабар берди.
Маълум қилинишича, ушбу мамлакат Давлат протоколи раҳбари Роҳана Амбаголла Ўзбекистон раҳбариятига Шри Ланкада илк элчисини тайинлагани учун миннатдорлик билдирди. Унинг таъкидлашича, мазкур қадам икки мамлакат ўртасидаги дўстона муносабатларни мустаҳкамлаш йўлидаги муҳим сиёсий қарор бўлиб, ўзаро ҳамкорликка янги суръат бағишлайди. Шри Ланканинг Ўзбекистон билан янги форматдаги ҳамкорликка очиқлиги тасдиқланди.
Элчи унга ишонч ёрлиғи нусхаларини топширди. Шри Ланка Ўзбекистон билан барча йўналишларда, хусусан, савдо, логистика, таълим ва туризм соҳаларида амалий ҳамкорликни жадал кенгайтиришдан манфаатдор экани алоҳида қайд этилди.
Икки мамлакат ўртасида иқтисодий дипломатияни ривожлантириш масалалари, ўзаро савдо-иқтисодий алоқалар юзасидан атрофлича фикр алмашилди. Икки томонлама савдо айланмасининг ҳозирги ҳажми қониқарсиз экани қайд этилиб, ушбу кўрсаткични яқин истиқболда 50 миллион долларга етказиш учун аниқ чораларни кўришга келишиб олинди.
Экспорт ва импорт суратларини ошириш учун транспорт ва логистика ечимларини биргаликда ишлаб чиқиш, ахборот технологияларидан унумли фойдаланган ҳолда онлайн платформа ва дастурларни ишлаб чиқиш ҳамда йўлга қўйиш масалалари хусусида фикр алмашилди.
Шри Ланка — Ҳинд океанида жойлашган, Ҳиндистоннинг жанубий қирғоқлари яқинидаги тропик орол давлат бўлиб, Ўзбекистон билан дипломатик муносабатлар 1999 йил октябрида ўрнатилган.
Алишер Тўхтаев 2024 йилнинг октябридан буён Ўзбекистоннинг Покистондаги элчиси лавозимида ҳам ишлаб келмоқда. Элчи бўлишидан аввал Ўзбекистон ташқи ишлар вазири маслаҳатчиси лавозимида ишлаган.
Изоҳ (0)