Эрдўғон Туркия чегаралари яқинида яна бир ҳарбий операция ўтказилишини эълон қилди

Туркия ўз чегаралари яқинида янги ҳарбий операция ўтказади. Бу ҳақда Туркия президенти Ражаб Тоййиб Эрдўғон маълум қилди, дея хабар бермоқда «РБК».

«Биз террорчилик ташкилотларини тийиб қўйиш мақсадимиздан воз кечмаймиз. Биз ‘Фрот қалқони’ ва ‘Зайтун новдаси’ операциялари қаторига яна бирини қўшамиз. Аскарларимиз янги миссияга тайёр», — деди Эрдўғон.

Расмий Анқара 2018 йил январь ойи охиридан бери «Зайтун новдаси» номли ҳарбий операция ўтказмоқда; ундан кўзланган мақсад — Туркияда террористик деб ҳисобланадиган «Курдистон ишчи партияси» билан алоқадорликда гумон қилинаётган курд қуролли бўлинмаларига қарши курашдир.

Туркия ҳарбийлари асосан курд мудофаа бўлинмалари томонидан назорат қилиб турилган Суриянинг Африн минтақасида ҳаракат қилмоқда. Расмий Дамашқ Туркиянинг бу хатти-ҳаракатларини агрессия деб баҳоламоқда.