Енгил вазн тоифасида UFC чемпионлик камарига эга, ҳали мағлубият нима эканлигини билмаган 28 ёшли испан-грузин жангчи Илия Топурия профессионал боксдаги энг шов-шувли баҳслардан бири — супер ўрта вазндаги (–76,2 кг) мутлақ жаҳон чемпиони унвони учун бўладиган Сауль “Канело” Алварес (Мексика) ва Теренс Кроуфорд (АҚШ) ўртасидаги жанг ғолибига қарши жанг қилиш истагини билдирди.
Мен Канело – Кроуфорд жанги ғолибига қарши курашишга тайёрман. Аммо Канелога қарши жанг қилишни истамайман. У менинг кумирим бўлган ва ундан жуда кўп нарсани ўргандим, — деди Топурия.
Эслатиб ўтамиз, 29 июнь куни Лас-Вегасда бўлиб ўтган UFC 317 мусобақасида Топурия бразилиялик Чарльз Оливейрани биринчи раундда нокаутга учратиб, ғалаба қозонган эди. Шу тариқа, у UFC енгил вазн тоифасининг янги чемпионига айланди ва промоушен тарихида икки вазн тоифасида чемпионлик камарини қўлга киритган ўнинчи жангчи сифатида тарихга кирди.
Маълумот учун, Сауль “Канело” Алварес ва Теренс Кроуфорд ўртасидаги жанг 2025 йил 13-сентябрьда Лас-Вегасдаги “Allegiant” спорт мажмуасида ўтказилиши режалаштирилган. Ушбу супер ўрта вазн тоифасидаги жанг Канелонинг мутлақ чемпионлик камарини ҳимоя қилиш учун бўлади. Икки вазн тоифасида тўрт марта жаҳон чемпиони бўлган Кроуфорд эса вазн кўтариб, навбатдаги чемпионлик унвони учун рингга чиқади.
Изоҳ (0)