Олий Мажлис Қонунчилик палатаси қўмиталарида бир қатор муҳим қонун лойиҳалари иккинчи ҳамда учинчи ўқишда кўриб чиқиш учун тайёрланмоқда. Бу ҳақда «Халқ сўзи» хабар берди.
Хусусан, Қонунчилик ва суд-ҳуқуқ масалалари қўмитаси томонидан шахсни жиноий жавобгарликка тортиш муддатларини қисқартиришни назарда тутувчи қонун лойиҳаси мутахассислар, экспертлар ҳамда жамоатчилик вакиллари иштирокида ташкил этилаётган ишчи гуруҳи йиғилишларида иккинчи ўқишга тайёрланаяпти.
Таклиф этилаётган лойиҳага мувофиқ, ижтимоий хавфи катта бўлмаган жиноят содир қилинган кундан бошлаб 2 йил, унча оғир бўлмаган жиноят содир этилган кундан бошлаб 4 йил, оғир жиноят содир қилинган кундан бошлаб 8 йил, ўта оғир жиноят содир этилган кундан бошлаб (ушбу модданинг еттинчи қисмида назарда тутилган ҳол бундан мустасно) 14 йил ўтиб кетган бўлса, шахс жавобгарликдан озод қилиниши белгиланмоқда.
Жиноят кодексининг 64-моддаси 5-қисмида жиноят содир этилган кундан бошлаб 25 йил ўтган бўлса, шахс жавобгарликка тортилиши мумкин эмаслиги кўрсатилган. Яъни ижтимоий хавфи катта бўлмаган ва унча оғир бўлмаган жиноят содир қилиб, қидирувда бўлган шахслар оғир ҳамда ўта оғир жиноят содир этиб, тергов ва суддан яширинган шахслар билан тенг равишда жиноий таъқиб қилинади.
Лойиҳа билан мазкур қисм ўзгартирилиб, ижтимоий хавфи катта бўлмаган ёки унча оғир бўлмаган жиноят содир этилган кундан бошлаб 10 йил, оғир ва ўта оғир жиноят содир қилинган кундан бошлаб 25 йил ўтган бўлса, шахсни жиноий жавобгарликка тортиш мумкин эмаслиги назарда тутилмоқда.
Изоҳ (0)