Бир неча кун олдин ўзбекистонлик профессионал боксчи Шоҳжаҳон Эргашев хитойлик рақиби Жимин Вангни мағлубиятга учратиб, WBA International камарини қўлга киритганди.
Бугун, 3 май санасида Шоҳжаҳон Америка Қўшма Штатларидан Москва орқали Ўзбекистонга қайтиб келди. Боксчи Ислом Каримов номидаги Тошкент халқаро аэропортида тантанали тарзда кутиб олинди.
«Ватанимга ёруғ юз ва фаолиятимдаги илк камар билан қайтиб келганимдан бениҳоя мамнунман. Ушбу ғалаба барчамиз, мен учун дуода бўлган бутун ўзбек халқининг ғалабаси деб биламан. WBA International камарини эса биз ёшлар учун беқиёс шароитлар яратиб бераётган юрт отаси – муҳтарам Президентимизга бағишлайман. Насиб қилса бундан кейинги жангларимда навбатдаги ғалабаларим билан Ўзбекистонимиз довруғуни дунёга танитишда ўз ҳиссамни қўшаман», – деди Шоҳжаҳон Эргашев.
Маълумот учун Шоҳжаҳон профессионал рингдаги фаолияти давомида 12 та жанг ўтказган ва уларнинг барчасида ғалаба қозонган. 11 та жангда у рақибларини нокаут эвазига мағлуб этган.
Изоҳ (0)