ФИФА президенти Жанни Инфантино 2 йилда бир марта мини-жаҳон чемпионати ўтказишни таклиф қилди

ФИФА президенти Жанни Инфантино икки йилда бир марта мини-жаҳон чемпионати ўтказишни таклиф қилмоқда. Бу ҳақда Reuters’га таяниб, «РБК» хабар берди.

Жанни Инфантино халқаро футбол ислоҳотлари доирасида икки йилда бир марта ўтказилиадиган мини-жаҳон чемпионати таклифини берди. Унинг таклифига кўра, мини-жаҳон чемпионати саккиз терма жамоани бирлаштиради.

ФИФА раҳбарининг сўзларига кўра, «Финал 8» деб номланган янги мусобақа 2021 йилнинг октябрь—ноябрь ойларида ўтказилиши мумкин. Таъкидланишича, бир қатор инвесторлар ушбу янги мини-жаҳон чемпионати ҳамда 2021 йилдан 24 жамоа иштирокида бошланадиган янгиланган Клублар ўртасидаги жаҳон чемпионатига 25 миллиард доллар сарфлашга тайёр.

Инфантино таклифига биноан, Конфедерациялар Кубоги ҳар тўрт йилда бир марта ўтказиладиган Жаҳон Чемпионатидан бир йил олдин бекор қилинади. «Финал 8» Европа чемпионати, Африка миллатлари кубоги, Копа Америка ва Жаҳон Чемпионати саралаш мусобақаларига халақит бермайди

Бу мусобақа амалга ошиши учун Инфантинонинг таклифи ФИФА кенгаши томонидан қўллаб-қувватланиши лозим.