Аввал хабар берилганидек, кеча, 2 май санасида Европа Чемпионлар Лигаси ярим финали жавоб учрашувида «Рома» ўз майдонида «Ливерпуль»ни қабул қилиб, 4:2 ҳисобида ғалаба қозонди.
Аммо бу ғалаба римликларнинг финалга чиқиши учун етарли бўлмади. Биринчи ўйиндаги 2:5 ҳисобидаги мағлубият туфайли «Рома» мусобақадаги иштирокини якунлади. «Ливерпуль» эса финалда «Реал»га қарши ўйнайдиган бўлди. Бу мавсум «мерсисайд» жамоаси клублар ўртасидаги Европанинг нуфузи жиҳатидан 1-ўринда турадиган мусобақасида гол уриш борасида сермаҳсуллик кўрсатди. «Ливерпуль» Европа Чемпионлар Лигасида бир мавсум давомида урилган голлар сони бўйича «Барселона» ўрнатган рекордни янгилади.
«Рома» билан кечган жавоб баҳсининг 25-дақиқасида жамоасининг иккинчи голини урган Жоржино Вейналдум «Ливерпуль» учун мусобақадаги сўнгги 14 ўйинда киритилган 46-голни уришга муваффақ бўлди. Бу натижа нафақат Европа Чемпионлар Лигаси, балки барча Еврокубоклар ўртасида ҳам рекорд натижа сифатида тарихга кирди.
Изоҳ (0)