Халқаро бокс уюшмаси (AIBA) ташкилотнинг вақтинчалик президенти Ғофур Раҳимовнинг расмий баёнотини ўз сайтида эълон қилди. Бу ҳақда SportInform хабар бермоқда.
Баёнотда айтилишича, ўзбекистонлик арбоб Ғофур Раҳимов Вашингтон ва Лондондаги юристларига АҚШ чет эл активларини бошқариш офисига унинг исмини «махсус белгиланган фуқаролар рўйхати»дан ўчириш бўйича илтимоснома киритишни топширган. Яъни у ўз исмини санкцион рўйхатдан чиқаришни хоҳламоқда:
«Бу жаноб Раҳимовнинг исмини ва мавқени ОАВдаги асоссиз айбловлардан тозалаш бўйича серғайрат ҳаракатларидан биридир. Жаноб Раҳимовнинг баёнотида айтилишича, у энг яхши юристларнинг хизматларини сақлаб қолган бўлиб, улар ОАВдаги у уюшган жиноятчиликка алоқадорлиги ҳақидаги хабарлар асоссиз эканлигини исботлаб беради».
«Мен ҳеч қачон ҳеч қандай уюшган жиноий гуруҳ билан боғлиқ бўлмаганман, менга қарши ҳеч қачон айбловлар илгари сурилмаган. Айни пайтда АҚШ ғазначилигининг босими давом этмоқда, мен эса AIBA бошқаруви ва молиявий барқарорлигини тиклаш бўйича ҳаракатларимни давом эттирмоқдаман. Мен боксни яхши кўраман. AIBA ҳар қандай таҳдидни енгади, менга қарши асоссиз айбловларга қарамай, мен ҳаётимни спортга бағишлашда давом этаман», — дейилади Ғофур Раҳимовнинг баёнотида.
AIBA президентлигига сайлов жорий йил ноябрида Москвада бўлиб ўтади.
Изоҳ (0)