Ўзбекистон миллий терма жамоасининг жорий йилнинг 19 май куни бўлиб ўтадиган Эронга қарши ўйини сабаб Суперлига тақвимида ўзгариш юзага келди. Бу ҳақда ПФЛ ахборот хизмати маълум қилди.
Даставвал Эрон ва Ўзбекистоннинг Теҳронда ўтиши керак бўлган халқаро ўртоқлик учрашуви 17 май санасига келишилган бўлиб, ПФЛ Суперлига тақвимини шунга қараб мослаштирганди. Бироқ кейинчалик форслар 19 май санаси бўйича келишув таклиф қилди. Шу тариқа ўртоқлик ўйинининг ўтиши сўроқ остида қолди. Аммо яқинлашиб келаётган Осиё ўйинлари сабаб терма жамоа мураббийлар штаби Эронга қарши учрашувни керакли деб ҳисоблади, дейилади хабарда.
Шундан сўнг ЎФА ҳамда ПФЛ масала ечимини терма жамоага нисбатан кўпроқ футболчилар бераётган клублар бош мураббийлари ҳукмига қолдирди. Агар улар Эронга қарши учрашув ҳеч нарса бермаслиги борасида қарор чиқарса, Теҳрондаги ўйин бекор бўлиши керак эди. «Пахтакор», «Бунёдкор», «Насаф», «Навбаҳор» мураббийлари иштирок этган йиғилишда ЖЧ чиптасини қўлга киритган термага қарши ўйин фойдали бўлиши таъкидланди. Келишув ўз кучида қолиши учун мураббийлар таклиф берди — Суперлиганинг 12-тур беллашувлари бошқа санага кўчирилиши керак эди.
Шундан келиб чиқиб, ПФЛ 12-тур вақтларига ўзгартириш киритди. Эронга қарши халқаро ўртоқлик ўйини эса ўз кучини сақлаб қолди.
12-тур беллашувлари 20 май куни старт олиб, 22 май куни якунига етиши керак эди. Эндиликда «Насаф» ҳамда «Нефтчи» клублари ўртасидаги беллашув 14 май — душанба кунига кўчди. АГМК — «Бунёдкор», «Навбаҳор» — Металлург», «Сўғдиёна» — «Пахтакор» учрашувлари эса 15 май санасига тайин қилинди. Осиё Чемпионлар Лигасида иштирок этаётган Ўзбекистон клубларининг халқаро майдондан четда қолгани айнан шу кунларда бўшлиқ ҳосил қилаётганди.
Миллий терма жамоа Эронга 17 май куни йўл олади ҳамда 20 май санасида қайтиб келади. Терма жамоа лагерига нисбатан камроқ футболчисини жўнатаётган «Қўқон-1912» ҳамда «Локомотив» клублари иштирокидаги 2 та ўйин 22 май — сешанба куни бўлиб ўтади.
Pepsi Суперлига
12-тур беллашувлари
14 май, душанба
Изоҳ (0)