Шарқий ҳарбий округ ҳудудидаги «Фарғона» дала-ўқув майдонида Ми-8 вертолётларида парвоз қилиш ва парашютда сакраш бўйича амалий машғулотлар ўтказилди. Унда 120 нафар ҳарбий хизматчи қатнашди. Бу ҳақда «Дарё» мухбири Азизжон Эрматов хабар берди.
Ўзбекистон Республикаси Мудофаа вазирлиги ва Фарғона вилояти ҳокимлиги томонидан ташкил этилган кўргазмали тактик-ўқув машғулотларини Фарғона давлат университети қошидаги 2-академик лицейи махсус гуруҳининг 100 нафардан ортиқ ўқувчилари ҳам кузатиб борди.
Дала-ўқув майдонида белгиланган ҳудудларда ўқувчилар ҳарбий техника ва қурол-аслаҳалар билан яқиндан танишди. Тактик-ўқув машғулотларида ҳарбийлар томонидан жанговар қурол ва ҳарбий техникалар имкониятидан, замонавий ахборот технологиялари ва алоқа воситаларидан унумли фойдаланиш юзасидан тушунчалар берилди. Ҳарбий хизматчилар иштирокида ҳудудни ўрганиш, позицияларни эгаллаш, амалий тарзда қўйилган жанговар вазифа бажарилиши намойиш этилди.
Бир гуруҳ ҳарбийлар СПГ-9, АГС-17, РПГ-7 ўқотар қуроллари ва пулемётдан амалий ўқ отиш ҳамда белгиланган нишонни йўқ қилиш машқларини бажарди.
Изоҳ (0)