Жиззах вилояти ички ишлар органлари томонидан сирдарёлик фуқарони алдаб кетган фирибгар аёл қўлга олинди. Бу ҳақда вилоят ИИБ матбуот хизмати хабар бермоқда.
Хабар беришларича, Сирдарё вилояти Оқолтин тумани Шодлик маҳалласида яшовчи аёлнинг уйига 2017 йилнинг июлида Жиззахнинг Шароф Рашидов туманида истиқомат қилувчи таниши меҳмон бўлиб келади. Учрашув давомида меҳмон сирдарёлик фуқаронинг тилла узугини тилла занжир қилиб, 5 миллион сўм пулини 10 миллион сўм қилиб қайтариш шарти билан қарзга олади.
Жиззахлик аёл 2017 йилнинг ноябрида яна сирдарёлик танишининг уйига бориб, Жиззах шаҳридаги «Ором» бозори ичида тақинчоқлар сотадиган дўкон очаётгани, шунга яна 10 миллион сўм кераклиги, бу пулни тез орада аввалги қарзига қўшиб қайтаришини айтади. Сирдарёлик аёл бу сафар ҳам пул топиб беради.
«Орадан вақт ўтиши билан сирдарёлик аёл жиззахлик танишининг ваъдалари сароб бўлиб чиққанлигига ишонч ҳосил қилади», — деб ёзади Жиззах вилояти ИИБ матбуот хизмати. Шундан сўнг жабрланувчи ички ишлар органларига мурожаат қилган.
Хабар беришларича, мазкур ҳолатни бартараф этиш мақсадида Жиззах вилоят ИИБнинг тезкор гуруҳи гумонланувчи аёлни қўлга олиб, ҳолат юзасидан жиноят иши очган.
Изоҳ (0)