Ўзбекистон металл фондини ташкил этувчи рангли металл парчалари ва чиқиндиларини Республикада сақлаб қолиш, уни ташқарига олиб чиқиб кетилишига йўл қўймаслик, улардан оқилона фойдаланиш ва маҳаллий ишлаб чиқаришни ривожлантириш мақсадида «Рангли металл куни» тадбирлари ўтказилмоқда. Бу ҳақда «Ўзиккиламчиранглиметалл» АЖ матбуот хизмати «Дарё»га хабар берди.
Ўзбекистон Республикаси Вазирлар Маҳкамасининг 2017 йил 18 октябридаги «Рангли металл парчалари ва чиқиндиларини тўплаш, топшириш ҳамда қайта ишлаш тизимини такомиллаштириш чора-тадбирлари тўғрисида»ги Қарорига асосан ташкил этилаётган мазкур тадбир республиканинг барча ҳудудларида мулкчилик шаклидан қатъи назар хўжалик юритувчи субъектларни ва аҳолини жалб қилган ҳолда ташкил этилмоқда.«Ўзиккиламчиранглиметалл» АЖ ҳамда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан ҳамкорликда ташкил этилаётган тадбир рангли металл парча ва чиқиндиларини ҳосил бўлиши, сақланиши, эҳтиётланиши, ноқонуний муомалага киритилишини олдини олишга хизмат қилади.Мазкур акция доирасида маҳаллий ҳокимликлар билан ҳамкорликда мобил шохобчалар ташкил этилиб, аҳолига уйидаги чиқиндиларни топшириш учун имконият яратилади. Акцияда аҳоли ўзида мавжуд металл чиқиндиларини нақд пулга топшириш имконияти мавжуд.Рангли металл куни тадбирлари жорий йилнинг 14 июнига қадар республиканинг барча ҳудудларида бўлиб ўтади. 10 апрель куни старт олган мазкур тадбирда бугунги кунга қадар 82,5 тонна металл парчалари ва чиқиндилари йиғилди.
Изоҳ (0)