19 апрель куни Ёшлар иттифоқининг Имконияти чекланган ёшларни қўллаб-қувватлаш маркази раҳбари Раъно Шодиева ҳамда Ёш ижодкорлар Кенгаши раиси Меҳриноз Аббосова Шовот туманидаги 1-сонли мактабнинг ўқувчилари билан ижодий мулоқот ўказди. Бу ҳақда иттифоқ раҳбари Қаҳрамон Қуронбоевнинг Facebook’даги саҳифаси орқали хабар берилди.
Учрашув самимий суҳбатдан бошланди. Мактаб ўқувчилари ўзларининг қизиқишлари ҳақида гапириб берди. Ўқувчиларнинг математика, физика, инглиз тилига бўлган қизиқиши меҳмонларни қувонтирди.
— Биз Оғабекни кашф этдик. 6-синф ўқувчисининг уруш ҳақида ёзган шеърларидан шуни англадимки, ҳаётда мақсадсиз яшашга ҳаққимиз йўқ. Мана шу ҳисни англаб етганингиз учун ташаккур, — деди Меҳриноз Аббосова мулоқот давомида.
Мактаб ўқувчилари ўзларининг ёзган шеърларидан намуналар ўқиб берди. Фаол иштирокчиларга меҳмонларнинг махсус совғалари тақдим этилди. Ўқувчиларнинг қувончи чексиз.
Шундан сўнг, Раъно Шодиева Урганч шаҳридаги 96-сонли мактаб-интернатига, Меҳриноз Аббосова эса Ёшлар марказида ўтказилиши кутилаётган ижодий учрашувга йўл олди.
Ижодий учрашувда хоразмлик ёш ижодкор Ҳулкар Ражабованинг шеърларини тинглаган М.Аббосова унинг илк шеърий китобини нашрдан чиқаришга ваъда берди.
— Кўзларингиздаги, шеърларингиздаги самимийликни кўриб ҳайратда қолдим. Айниқса, китобга берган ташбеҳингиз хотирамда қолади. Сизнинг илк китобингизни Ёш ижодкорлар кенгаши нашр қилади, — деди М.Аббосова.
Суҳбат давомида Раҳмат Бобожон тахаллуси остида ижод қилувчи ўқувчининг ҳам ҳикоялар ва шеърлар тўплами нашрдан чиқарилишига келишилди.
Изоҳ (0)