Ахборот технологиялари ва коммуникацияларини ривожлантириш вазири Азим Аҳмадхўжаев Россия Алоқа ва оммавий коммуникациялар вазири ўринбосари Алексей Волинни қабул қилди. Бу ҳақда вазирлик ахборот хизмати хабар бермоқда.
Учрашувда Россия президентининг Ишлар бошқармаси, Россия телевизион ва радиоузатиш давлат компанияси вакиллари, шунингдек, «Россия Сегодня», «Первий Канал», «Россия24» телеканаллари вакиллари иштирок этди.
Учрашувда икки томонлама алоқаларни кенгайтириш, жумладан медиа алоқаларни ривожлантириш, хусусан рақамли узатиш, технопарклар фаолияти, рақамли иқтисодиёт ва интернет тармоқларини тартибга солиш, АКТ соҳаси учун кадрлар тайёрлаш ва бошқа истиқболли йўналишларда ҳамкорликни ўрнатиш масалалари атрофлича кўриб чиқилди.
Хусусан, Россия делегацияси вакиллари мамлакатнинг рақамли тез узатиш тизимига ўтказилиши ҳақида маълумот берди ва мазкур рақамли платформада мобил телевидение фаолиятини йўлга қўйиш фикрини илгари сурди.
Шунингдек, томонлар Россиянинг «Первий Канал»и билан биргаликда телеканал ташкил қилиш масаласини ҳам муҳокама қилди. Ушбу телеканал россиялик режиссёрларни жалб қилган ҳолда ўзбекистонлик атоқли намояндалар фаолияти, ўзбек олимларининг жаҳон тараққиётидаги ҳиссасига бағишланган ҳужжатли фильм ҳамда дастурлар тайёрлашга хизмат қилади.
Томонлар мунтазам равишда давлат органларининг ахборот хизматлари учун махсус форум ва семинарлар ташкил қилишни келишиб олди, мутахассислар малакасини ошириш юзасидан ҳамкорликка доимо тайёр эканликларини маълум қилди.
Изоҳ (0)