«Дарё»га Фарғонадан яна бир мурожаат келди. Аҳоли вакилларининг айтишича, Бувайда туманидаги 8-умумтаълим мактабида ўқувчиларга жой ва билим олиш учун шароит етарли эмас. Мактаб биноси эса кенгайтириш ва қайта қуришга муҳтож.
«Дарё» мухбири Азиз Эрматов мурожаатни ўрганиш давомида мослаштирилган бинода жойлашган мазкур мактабдаги вазият ниҳоятда ачинарли эканига гувоҳ бўлди. 1976 йилда қурилган бино 320 ўринга мўлжалланган бўлса-да, айни пайтда бу ерда 630 нафар ўқувчи таҳсил олмоқда. Мактабда спорт зали ва ошхона йўқ. Хоналар жуда тор ва таъмирталаб. Бунинг устига, ўқувчиларга жой етишмайди. Айрим хоналар пол ҳам қилинмаган.
«Мактабимизда ўқувчи сони кўплигидан тўлиқ икки сменада дарс ўтилади. Шунда ҳам жой етишмайди, бирорта бўш хона йўқ. Ўзимиз хоналарни бўлиб чиқдик, қўл кучи билан. Ошхона, омборхона, ҳатто қоровулхонани ҳам синф хоналарига мослаштирдик. Айрим хоналарни пол қилдик. Эски парталарни топиб келиб, жиҳозладик. Ҳозирча бир амаллаб дарс ўтяпмиз. Лекин янги ўқув йилидан ўқувчилар сони яна кўпаяди, унда нима қиламиз? Сентябрь ойида учта биринчи синфга ўқувчи қабул қилишимиз керак. Уларни қайси хонага жойлаштиришни билмаймиз. Бир неча марта ҳокимликка, халқ таълими бўлимига мурожаат қилдик. Лекин ҳалигача амалий натижа бўлмади», — дейди мактаб директорининг ўринбосари Имомали Ниёзов.
Директор муовини бизни 7-синф ўқувчилари дарс ўтаётган хонага бошлади. 30 нафар ўқувчи таълим оладиган синфда 22 та стул санадик. Ўқувчиларнинг айтишича, хонага ким олдинроқ келса, жой ўшаники бўларкан. Қолганлар эса ё тик туриб дарс ўтади, ё уйига қайтиб кетаверади.
«Сентябрдан бери шундай дарс ўтамиз. Битта партада уч кишидан ўтириш қийин, шунга тўрт-бештамиз тик турамиз ё навбати билан жой алмашиб ўтирамиз,» — дейди 7-синф ўқувчиси Фатҳулла Ҳусанов.
Вазият шу даражага етганки, айрим ота-оналар жой етишмаслиги сабаб фарзандини мактабга жўнатмасликни афзал кўрмоқда.
«Қирғизқўрқонча қишлоғида яшайман. Қизим илгари ихтисослашган мактаб-интернатида ўқирди. Уйимизга яқин деб ўқишини шу мактабга кўчирганимдан энди ўзим ҳам, қизим ҳам афсусланяпмиз. Чунки мактабда яхши билим олиш учун шароит етарли эмас. Ўқув жиҳозлари йўқ, хоналар тор, зах, таъмирталаб. Болаларимизга жой етишмайди,» – дейди Дониёржон Абдулазизов.
Бошқа хонада эса бошланғич синф ўқувчилари учун мослаштирилган кичик парталарда 10-синф ўқувчилари бир амаллаб дарс ўтаётганига гувоҳ бўлдик.
Информатика хонасига кирдик. 16 нафар ўқувчи базўр сиғадиган хонада умуман компьютер йўқ. Директор ўринбосарининг айтишича, 1990-йилларда мактабга компьютерлар ажратилган. Уларнинг фойдаланиш муддати тугагач, информатика хонасида компьютерлар ҳам бўлиши кераклиги мутасаддиларнинг ёдидан кўтарилади.
Кимё ва биология хоналаридаги махсус жиҳозланиши керак бўлган парталар ҳам ачинарли аҳволда.
Спорт зали ва майдончаси йўқлиги учун ўқувчилар мактаб ҳовлисида шуғулланишга мажбур.
Жисмоний тарбия дарслари эса айрим спорт «жиҳозлари» ўрнатилган қўлбола майдонда ўтилади.
Бу ерга ҳам ўқувчилар катта йўлни кесиб ўтишлари керак. Бу ҳолат қай даражада хавфсиз, буниси номаълум.
«Йўлнинг серқатнов қисмида пиёдаларга умуман шароит яратилмаган. Ўқувчилар мактабга келиб-кетгунича хавотирда турамиз, бирор корҳол бўлмасин, деб. Яқинда бир ўқувчимиз йўл-транспорт ҳодисасига учради. Бола дарсдан кейин уйига кетаётганда шу нохуш ҳодиса юз берди. Бу ҳодисани ортидан қанча югур-югур қилдик, қанча гап эшитдик. Ўқитувчилари қарамаган дейишди, охири», – дейди директор муовини.
Хуллас, катта йўл ёқасида жойлашган бу мактаб эътибордан четда қолиб кетган. Бу ерда жиддий муаммолар йиғилиб қолгани билан мутасаддиларнинг иши йўқ. Туман халқ таълими бўлими мудири ҳам негадир бу ишга бефарқ.
Мактаб директори Саминжон Шамсиддинов бу ердаги шароитни яхшилаш, мактаб учун янги бино қуриш борасида туман ҳокимлиги ва тегишли мутасаддиларга кўп марта мурожаат қилган. Улар қайта-қайта такрорлайдиган жавоб эса битта — бу муаммони ҳозирча дастурга киритиш имконсиз, кейинги йилда албатта бўлади. Афсуски, вақт бир жойда тўхтаб турмайди — йиллар ўтяпти, лекин ваъдалар ваъдалигича қолмоқда.
Янги бино қуриш масаласини қисқа муддатда ҳал этишнинг имкони йўқдир, лекин қўшимча мактаб парталари, лаборатория жиҳозлари, компьютер тўпламлари етказиб бериш мумкин-ку? Ёки бу масалалар ҳам давлат дастурига киритилишини кутиш керакми?
«Дарё» ушбу мактаб билан боғлиқ муаммоларга яна қайтади.
Изоҳ (0)