Facebook асосчиси Марк Цукерберг 10 апрель, сешанба куни АҚШ сенати қаршисида нутқ сўзлади, деб ёзади Spot.
Цукерберг катта ҳажмдаги шахсий маълумотларнинг тарқалиб кетиши юз берганини ва ундан сиёсий консалтингга ихтисослашган Cambridge Analytica компанияси фойдаланиб қолганини тан олди. Ижтимоий тармоқ маълумотларига кўра, тадқиқотчи Александр Коган сўров дастурини яратган, у 300 мингга яқин фойдаланувчига ўрнатилган. Сервис фойдаланувчиларнинг шахсий маълумотларидан фойдаланган, сўнг уларнинг 10 миллион нафар дўстлари ҳақидаги маълумотни ҳам қўлга киритган.
Марк Цукерберг фойдаланувчилар қаршисида узр сўради ва маълумотларнинг тарқалиб кетиши унинг хатоси бўлганини айтиб, айбни ўз бўйнига олди.
Цукербергнинг сўзларига кўра, шов-шув юзасидан компания ички текширув ўтказмоқда.
Сенатдаги нутқида Facebook асосчиси яна бир бора Ўзбекистонни тилга олди ва Россиянинг «троллар фабрикаси» сифатида машҳур бўлган «Интернет тадқиқотлар агентлиги» (Internet Research Agency, IRA) компаниясига тегишли бўлган 270 дан ортиқ саҳифа ва аккаунтлар бир нечта мамлакатлар, шу жумладан, Ўзбекистоннинг рус тилида сўзлашувчи аҳолисига қаратилган тарғиботни тарқатганини тасдиқлади.
Аввалроқ Марк Цукерберг ўз компанияси Россиянинг «троллар фабрикаси» сифатида машҳур бўлган «Интернет тадқиқотлар агентлиги» (Internet Research Agency, IRA) компаниясига тегишли бўлган 270 дан ортиқ саҳифа ва аккаунтларни аниқлаб, блоклаб қўйганини маълум қилган эди. «Блоклаб қўйилган аккаунт ва саҳифалар Россияда яшайдиган одамларга, шунингдек, Озарбайжон, Ўзбекистон ва Украина каби қўшни мамлакатлардаги рус тилида сўзлашувчиларга ҳам қаратилган эди», — деган эди Цукерберг.
Изоҳ (0)