Душанбе шаҳрида Ўзбекистон Миллий олимпия қўмитаси президенти Умид Аҳмаджонов Тожикистон спорт вазири ва шу вақтнинг ўзида МОҚ биринчи вице-президенти ҳисобланган Абдуллозода Аҳтам Рустам учрашди, деб хабар беради МОҚ.
Олимпиада ва Осиё Ўйинларида муваффақиятли иштирок этиб келаётган Ўзбекистон, қўшни Тожикистон мамлакатига спортчларининг йирик турнирларга тайёргарлиги, маҳоратли спортчиларни етказиб бериш каби масалаларда ҳамкорлик қиладиган бўлди, дейилади хабарда.
«Тожикистон спортчилари билан ҳамкорлик нафақат улар учун, балки биз учун ҳам жуда фойдалидир. Умид қиламанки, бўлажак йирик турнирларда қўшниларимиз ҳам муносиб иштирок этишади. Ана шунда бу муваффақиятларнинг бир қисмида бизнинг ҳам ҳиссамиз бор эканидан фахрланишимиз мумкин бўлади. Қолаверса, қўшниларимиз билан илиқ муносабатларни йўлга қўйишнинг ўзи чиройли иш. Ҳар қандай мусобақа давомида биз уларга, улар бизга мухлислик қилиб, бир-биримизни қўллаб-қувватлаб, бир-биримизга суяниб туришимиз ўзаро ҳамкорлигимиз қадрини яна бир карра ошириб беради», — деди МОҚ раҳбари Умид Аҳмаджонов.
Бир вақтнинг ўзида ЎФА биринчи вице-президенти бўлган Умид Аҳмаджонов эртага — 11 апрель куни Душанбе шаҳрида Тожикистон футбол федерацияси раҳбарияти билан учрашади.
Изоҳ (0)