Амир Темур таваллуд топган кун муносабати билан 9 апрелда Яккабоғ туманидаги соҳибқирон дунёга келган Хўжа Илғор қишлоғида байрам сайли ўтказилади. Бу ҳақда Туризмни ривожлантириш қўмитаси Қашқадарё вилоят бошқармаси маълум қилди, дея хабар беради UZ24.
Хўжа Илғор қишлоғидаги 6 гектарлик ҳудудда Амир Темур боғи барпо этилмоқда, концерт дастурлари учун катта саҳна ўрнатилмоқда. Боғнинг бир қисмида сайёҳлар учун дам олиш жойлари, ўтовлар тикланмоқда.
Шунингдек, ушбу масканга Халқаро пресс-клуб бошчилигида медиа-тур уюштирилиши, телемарафон ўтказилиши ҳам режалаштирилган.
Халқ сайлида Қашқадарёнинг тандир гўшт, кийик гўшти, қозон кабоб, тандир сомса сингари дунёга машҳур таомлари тайёрланади ҳамда меҳмонларга тортиқ қилинади.
Байрам сайлида қатнашишни истаган чет эллик меҳмонлар учун шу куни Қарши ва Шаҳрисабз шаҳарларидан Хўжа Илғор қишлоғигача махсус автобуслар қатнови ташкил этилади.
Изоҳ (0)