Фарғона шаҳридаги Atlas, Media Park ва бошқа йирик савдо-кўнгилочар марказларида жамоат жойларида ёнғин билан боғлиқ ва бошқа турдаги фавқулодда вазиятларнинг олдини олишга қаратилган ўқув машғулотлари бўлиб ўтди. Бу ҳақда «Дарё» мухбири Азиз Эрматов хабар берди.

Ёнғин хавфсизлиги ва фавқулодда вазиятлар бошқармалари, давлат санитария эпидемиология маркази, газ ва электр таъминоти корхоналари ҳамкорлигида ўтказилган машғулотлар доирасида бозорлар ва савдо-кўнгилочар марказларида ёнғин чиққан тақдирда аҳолини қутқариш ва ўтни ўчириш йўллари машқ қилинди. Ҳар икки бинонинг ёнғин пайтида фойдаланиш кўзда тутилган йўлаклари, эвакуация режалари ва жиҳозлари кўздан кечирилиб, соз ҳолга келтирилди.

Машғулотлар давомида мажмуа ходимлари ёнғин келиб чиққанда уни бартараф этиш, фуқароларни эвакуация қилиш, жабрланганларга биринчи ёрдамни кўрсатиш машқларини бевосита мутахассислар билан биргаликда бажарди. Ушбу ўқув машғулотларида 255 нафар фуқаро иштирок этди.

Вилоят ҳокимлигида ёнғин хавсизлигини таъминлашга бағишлаб ўтказилган йиғилишда бу борада Фарғона ва Қўқон шаҳарларида аниқланган камчиликлар аёвсиз танқид қилинди. Ёнғин хавфсизлиги қоидаларига риоя этилишини замонавий мезонлар бўйича ташкил этиш, архитектура ва қурилиш, электр ва газ таъминоти билан боғлиқ меъёр ва талаблар борасида керакли тавсиялар берилди.

— Ёнғин хавфсизлиги профилактикаси ва бу борада олиб борилаётган ишлар самарадорлигини ошириш мақсадида вилоят ҳокимлигининг алоҳида чора-тадбирлар режаси белгиланди, — дейди Фарғона вилояти ҳокимининг ўринбосари Қамариддин Имомов. — Шу асосда вилоятдаги ҳар бир корхона-ташкилот, хўжалик юритувчи субъектда ёнғин хавфсизлиги, фуқаро муҳофазаси, фавқулодда вазиятларда ҳаракатланиш бўйича тизимли ишлар ташкил этишга раҳбар ва масъул ходимлар бевосита жавобгар ҳисобланади.

Маълумот учун, айни пайтда Фарғона вилоятида 42 та бозор, 10 га яқин йирик савдо-кўнгилочар мажмуаси фаолият кўрсатмоқда.