2018 йил 4 апрель куни соат 19:18 да Қорақалпоғистон Республикаси Фавқулодда вазиятлар бошқармаси навбатчи-диспетчерлик хизматига 1050 телефон рақами орқали Нукус шаҳри Киров кўчаси 47-уйда яшовчи фуқаро томонидан 2 яшар қизининг қўли электр гўшт қиймалагичда («электромясорубка») қисилиб қолганлиги тўғрисида хабар келиб тушган. Бу ҳақда Қорақалпоғистон Республикаси Фавқулодда вазиятлар бошқармасига таяниб, «KRuz.uz» маълум қилди.
Келиб тушган мурожаат бошқарма бошлиғига етказилган ва зудлик билан навбатчи смена томонидан воқеа жойига етиб бориб, амалий ёрдам кўрсатиш бўйича кўрсатма берилган.
2018 йил 4 апрель куни соат 19:25 да воқеа жойига етиб келган қутқарувчилари вазият ҳақиқатдан ҳам қалтис эканлигини тушуниб, ўзаро маслаҳатлашган ҳолда электр гўшт қиймалагични қутқарув асбоб-анжоми («болгарка») ёрдамида кесиш бўйича тезкор қарор қабул қилган.
Қутқарувчилар томонидан ўта аниқлик билан олиб борилган тадбирлар натижасида қизалоқнинг қўли электр гўшт қиймалагичдан чиқариб олинган. Унинг қўли соғ-саломат, фақатгина бир-иккита жойи шилинган.
Изоҳ (0)