Республика ихтисослаштирилган кардиология илмий-амалий тиббиёт марказида уч қаватли янги бино фойдаланишга топширилди. Бу ҳақда Ўзбекистон Соғлиқни сақлаш вазирлиги ахборот хизмати хабар бермоқда.
Фойдаланишга топширилган янги бинода беморлар барча текширувлардан ўтиш имконига эга — функционал диагностика бўлимида ЭКГ, ЭХОКГ, ВЭМ, Тредмил тест, ХМЭКГ каби текширувлар, шунингдек, рентген, генетик таҳлил ўтказиш, амбулатор текширувлар хонаси ва маъмурий хоналар ташкил этилган.
Иккинчи қаватда 20 ўринга мўлжалланган интервенцион аритмология бўлими, рентген операцион блок ташкил этилган. Учинчи қаватда 20 ўринли интервенцион кардиология ва рентген эндоваскуляр жарроҳлик бўлими жойлашган бўлиб, бу ерда жаҳон тиббиётида қўлланилаётган интервенцион жарроҳлик амалиётларининг барчасини ўтказиш мумкин.
Янги бино қурилиши учун давлат томонидан 20 миллиард сўмдан зиёд маблағ сарфланди. Бинога ўрнатилган хорижий CIAT вентиляция системаси ҳароратни қишин-ёзин бир хилда сақлаш ва доимий тоза ҳаво билан таъминлаш имконини беради.
Германиянинг KfW банки томонидан Ўзбекистон тиббиёт муассасаларини жиҳозлаш учун ажратилган кредит маблағларининг 3,5 миллион евроси эвазига Рентген эндоваскуляр жарроҳлик бўлимига Голландиянинг Philips Allura Xper FD20 фирмаси томонидан ишлаб чиқарилган универсал ангиография ускунаси, электрофизиологик текширувлар учун BARD системаси, ҳаракатланувчи ангиография ускунаси, радиочастотали генератор ва бошқа юқори технологияли услубларга асосланган аппаратлар ўрнатилди.
Эндиликда янги бинода юрак қон-томир касалликлари профилактикаси, диагностикаси ва даволаш амалиётларини тизимли асосда амалга ошириш баробарида, йилига 1000 дан ортиқ беморда коронарография ва стентлаш амалиётини ўтказиш мумкин. Бундай усул билан юрак қон-томир касалликларининг энг оғир тури ҳисобланган миокард инфарктининг олди олинади. Ушбу илғор технологияларнинг тиббиётимизга кириб келиши туфайли кейинги 10 йил ичида миокарднинг ўткир инфарктидан содир бўлаётган госпитал ўлим ҳолатлари 9-10 фоизгача камайди.Академик Равшанбек Қурбонов, Республика ихтисослаштирилган кардиология илмий-амалий тиббиёт маркази директори
Бинода, шунингдек, Тошкент врачлар малакасини ошириш институтининг кардиология кафедраси ўқув хоналари, мажлислар зали, кутубхона, кардиология музейи, маърифат ва тарғибот хоналари ҳам ташкил этилди.
Изоҳ (0)