Тошкентнинг янгиланган Жанубий вокзалидан илк поезд Бухорога жўнаб кетди

Тошкент шаҳрида кенг кўламли реконструкциядан сўнг Жанубий вокзал фойдаланишга топширилди. Бу ҳақда Sputnik хабар бермоқда.

4 апрель, чоршанба куни соат 22:00 да янгиланган вокзалдан Тошкент — Бухоро йўналишида илк поезд йўлга чиқди.

Энди икки ой ичида бу ерга маҳаллий йўналишдаги барча поездлар ва шаҳарлараро электричкалар ўтказилади. Жумладан, Урганч, Андижон, Қўнғирот, Термиз, Сариосиё, Хўжакент, Ховос, Бекобод, Сирдарё, Гулистон ва бошқа манзилларга поездлар Жанубий вокзалдан жўнайди.

Йўловчилар хавфсизлигини таъминлаш учун вокзал биноси, касса зали ва атрофдаги ҳудуд 170 та кузатув камераси билан жиҳозланди, шошилинч эвакуация учун бир неча чиқиш йўлаклари кўзда тутилган.

Маълумот учун, Жанубий вокзал ҳар куни 11 минг йўловчи ва 17 та поездга хизмат кўрсатишга мўлжалланган.