Бухорода кулги куни «Насриддин Афанди» фестивали бўлиб ўтди (фото)

Бухоронинг эски шаҳар қисмида «Насриддин Афанди» фестивали бўлиб ўтди. Бу ҳақда Туризмни ривожлантириш давлат қўмитаси хабар берди.

Халқаро кулги кунига бағишланган тадбир кенг кўламда ўтказилди: Лаби ҳовуздан Арккача бўлган ҳудудда санъаткорлар чиқишлари уюштирилди, ҳунармандлар расталарида савдо қизиди.

Фестиваль меҳмонлари Афанди иштирокидаги театрлаштирилган томоша иштирокчисига айланди. Нафақат Ўзбекистон, балки Туркия ва Япония ошпазлари тайёрлаган таомлардан ҳам баҳраманд бўлди.

Шунингдек, меҳмонлар дорбозлар, цирк артистлари чиқишларини томоша қилди, шаҳар узра ҳаво шари учирилиши гувоҳи бўлди.

Бухорода шу куни кечгача мусиқа садолари тинмади, сайёҳлар эътиборига сувенирлар ва миллий ҳунармандчилик намуналари тақдим этилди.