Ўзбекистон Президенти Шавкат Мирзиёев Жиззах вилоятига ташрифи давомида 2018—2019 йилларда вилоятда ирригация-мелиорация Давлат дастури асосида амалга ошириладиган ишлар, гидроиншоотлар лойиҳалари билан танишди. Бу ҳақда ЎзА ва Президент матбуот хизмати хабар берди.
Вилоятда ирригация-мелиорация Давлат дастурига мувофиқ, жорий йилда сув иншоотларини реконструкция қилиш ишларига 188,5 миллиард сўм маблағ сарфланиб, 64,4 километрлик каналлар ва 118,8 километр лотоклар мукаммал таъмирланади, 3 километр қирғоқ мустаҳкамланади.
9,3 миллиард сўм эвазига 336 километр суғориш тармоқлари, 541 дона гидротехник иншоотлар, 50 дона насос агрегатлари ва электродвигателлар, 35 та суғориш қудуғи, Сув истеъмолчилари уюшмаси тасарруфидаги 1150 километр суғориш тармоқларида таъмирлаш ва тиклаш ишлари бажарилади.
Мелиоратив иншоотларни таъмирлашга қаратилган 28 лойиҳа доирасида 156,2 километр коллектор-дренаж тармоғи, 188,9 километр ёпиқ ва ётиқ дренаж, 9 гидротехник иншоот реконструкция қилинади.
Бу борадаги ишлар натижасида 94,6 минг гектар майдоннинг сув таъминоти яхшиланади, 1,5 минг гектар лалми ерларда томчилатиб суғориш тизимини жорий этиш имконияти яратилади.
Шавкат Мирзиёев жорий йилда Жиззах вилоятида 50 километр лоток тармоқларини қуриш ҳамда салкам 57 километр узунликдаги лотокларни таъмирлаш кераклигини таъкидлади. Бунинг учун зарур маблағлар ажратиш юзасидан мутасаддиларга тегишли кўрсатмалар берди.
Изоҳ (0)