Жиззах шаҳридаги 39-боғча тарбиячисининг болаларга қўл кўтариши билан боғлиқ ҳолат юзасидан бир гуруҳ масъуллар ишдан олинди. Бу ҳақда Мактабгача таълим вазирлиги матбуот хизмати «Дарё»га маълум қилди.
30 март куни интернетда Ўзбекистондаги боғчалардан бирининг тарбиячиси қўлидаги файл-папка билан болаларга қўл кўтараётгани акс этган видео тарқалиб кетган эди. Вазирлик 31 март куни ушбу ҳодиса аслида 27 март куни Жиззахдаги 39-сонли «Наврўз» мактабгача таълим муассасасида содир бўлгани, болаларга қўл кўтарган 37 ёшли тарбиячи ишдан бўшатилганини маълум қилди.
Мавзуга доир: Болаларни файл-папка билан ураётган тарбиячи видеоси Жиззахдаги боғчада олингани аниқланди. Тарбиячи ишдан ҳайдалди
31 март куни Жиззах шаҳрида Мактабгача таълим вазирлиги раҳбарияти, Жиззах вилояти мактабгача таълим бошқармаси, туман ва шаҳар мактабгача таълим бўлимлари раҳбарлари, Жиззах шаҳридаги барча боғчаларнинг мудиралари ва тарбиячилари, жумладан, «Наврўз» номли 39-боғча ходимлари иштирокида кенгайтирилган йиғилиш бўлиб ўтган.
Йиғилишда бундай нохуш ҳолатларни такрорламаслик ва ҳар бир ходим ўз ишига масъулият билан ёндашиши лозимлиги кўрсатиб ўтилган. Шунингдек, ўз ишида жиддий камчиликларга йўл қўйгани учун Жиззах шаҳар мактабгача таълим бўлими бошлиғи Фахриддин Қодиров эгаллаб турган лавозимидан озод этилган.
Изоҳ (0)