Ўзбекистон билан чегарадош ҳудудда Қирғизистон чегарачилари томонидан қуролланган шахслардан иборат икки гуруҳ қўлга олинди. Бу ҳақда Қирғизистон чегара хизмати маълум қилди.
«27 март куни Ола-Буқа чегара отряди чегарачилари Давлат миллий хавфсизлик қўмитаси ҳудудий бўлинмаси ходимлари билан ҳамкорликда Жалолобод вилоятининг Беш-Тош қишлоғида Қирғизистоннинг 5 нафар фуқаросини қўлга олди», — дейилади чегара хизмати хабарида.
Дастлаб чегарачилар 12 миллиметр калибрли ва ТОЗ-8 винтовкалари ва патронлар билан қуролланган икки шахсни тўхтатган. Уларда қурол олиб юриш учун ҳеч қандай ҳужжат бўлмаган. Қўлга олинганлар бу ерга балиқ овига келганини билдирган.
Бир соатдан сўнг шу ҳудудда Sarsilmaz винтовкаси билан қуролланган ва ёнида ўнлаб патрон бўлган 3 кишидан иборат яна бир гуруҳ қўлга олинди. Улар ов қилгани келганини айтган, бироқ на ўлжа, на қурол ҳужжатлари бўлган.
«Тегишли ҳужжатлар расмийлаштирилганидан сўнг қўлга олинган шахслар ва уларнинг қурол-яроғлари Давлат миллий хавфсизлик қўмитаси ҳудудий бўлинмаси ходимлари ихтиёрига топширилди», — деб маълум қилди чегара хизмати.
Изоҳ (0)