Қорақалпоғистон фермер хўжаликлари вакиллари Ўзбекистоннинг Берлиндаги элчихонаси кўмагида Германияда бўлиб қайтди, дея хабар беради «Халқ сўзи».
Сафар давомида улар германиялик касбдошлари, шунингдек, илмий-тадқиқот марказлари, уюшма ва компаниялари фаолияти ҳамда сут-гўшт маҳсулотлари ишлаб чиқариш учун зотдор қорамоллар етиштиришнинг замонавий технологиялари ва самарали усуллари билан танишди.
Жумладан, Мекленбург Олд Померания федерал ерида Rinderallianz зотдор чорвачилик уюшмаси, қорамоллар етиштиришга ихтисослаштирилган фермер хўжаликлари ва тармоқ компанияларида бўлиб, ветеринария назорати, озуқа тайёрлаш, уларни сақлашга оид лаборатория тадқиқотлари ҳамда технологияларини кўздан кечирди.
Bioenergie Postma фермер хўжалигида қорақалпоғистонлик меҳмонлар соатига 350 киловатт электр энергияси ишлаб чиқариш қувватига эга биогаз станциясида бўлди. 1,5 минг гектар ер ва 500 бош соғин сигирга эга мазкур фермер хўжалиги нафақат сут ҳамда гўшт маҳсулотлари, балки биогаз станциясида ишлаб чиқарилаётган электр энергиясининг ортиқчасини ҳам сотади.
Федерал ернинг йирик илмий марказларидан бири — Қишлоқ хўжалиги илмий-тадқиқот институтида (LUFA) бўлиб ўтган учрашув доирасида олим ва мутахассислар томонидан делегация аъзолари учун махсус тақдимот ташкил этилди.
Қорақалпоғистонлик фермерлар ушбу илмий марказда озуқабоп экинларнинг юқори ҳосилли, янги навларини яратиш ва экиш бўйича олиб борилаётган илмий изланишлар, шунингдек, чорва озуқаси маҳсулотларини етиштириш ҳамда таркибини белгилашда замонавий ва тежамкор технологиялардан фойдаланиш имкониятлари билан яқиндан танишди. Айниқса, ер таҳлили, шўрланган ерлар таркибини ўрганиш ҳамда шўрланишни бартараф этиш орқали ҳосилдорликни ошириш борасида эришилган натижалар тақдимоти юртдошларда катта қизиқиш уйғотди.
Мамлакат делегацияси аъзоларининг Бранденбург федерал еридаги чорвачиликка ихтисослаштирилган қатор ташкилотлар ва фермер хўжаликларидаги учрашувлари ҳам самарали бўлди.
Сафар якунлари бўйича Германиядан 1000 бош наслли қорамол сотиб олиш, шунингдек, қорақалпоғистонлик фермерларнинг бу ерда малака оширишларини ташкил этишга келишилди. Бундан ташқари, Қорақалпоғистондаги шўрланган ерлар намуналари ҳам Германия лабораториясида таҳлил этиладиган бўлди. LUFA институти раҳбарияти Оролбўйидаги иқлим ҳамда экологик ҳолатни ўрганиш учун ушбу минтақага сафар уюштириш ташаббусини илгари сурди.
Изоҳ (0)