Ўзбекистонлик беш нафар фуқаро Олмаотада гипноз ёрдамида нафақахўрларнинг пулини ўғирлашда гумонланиб қўлга олинди. Бу ҳақда шаҳар ички ишлар бўлими матбуот хизматига таяниб, Sputnik хабар берди.
Матбуот хизматининг хабарига кўра, қўлга олинганлар ўз ватанларида илгари жиноий жавобгарликка тортилган.
«Қоғоз пулларни текшириш ва янгисига алмаштириб бериш таклифи орқали улар қарияларнинг тўплаб қўйган пулларини олиб кетган. Маълум бўлишича, ушбу жиноий гуруҳдаги аёллар бунда гипноздан фойдаланишган: қариялар ўз жамғармаларини уларга қандай қилиб бериб юборишганини зўрға эслашган», — дейилади хабарда.
Тергов маълумотларига кўра, баъзида улар нафақахўрларни банккача кузатиб борган ва банкдан жамғармаларини олишларини кутиб турган.
«Айни пайтда уларнинг уч нафар пенсионерга нисбатан фирибгарлик ишлатишгани ва 3 миллион тенге (9 минг долларга яқин)ни қўлга киритишгани аниқланди», — деди полиция маҳкамаси вакили.
Изоҳ (0)