«Ўртада нифоқ бўлмагандек учрашдик»: Бир-бирларига саёҳат уюштирган ўзбекистонлик ва тожикистонликларнинг таассуротлари
Наврўз байрами билан боғлиқ дам олиш кунлари бир-бирларига саёҳат уюштирган ўзбекистонлик ва тожикистонлик фойдаланувчилар ижтимоий тармоқларда таассуротлари билан ўртоқлашмоқда. Бу ҳақда Asia-Plus маълум қилди, дея хабар беради «Халқ сўзи».
«Қарор қабул қилинди: чегара очиқ! Қани, кетдик. Эрталаб соат 8:00дан Тожикистон — Ўзбекистон чегарасига етиб келдик. Ҳеч қандай қаршилик йўқ, фақат маълумот. Биз томондаги чегарада озгина тартибсизликни ҳисобга олмаганда, ҳамма ўтяпти. Қардош Ўзбекистон томонда 5-6 нафар чегара хизмати зобити ва 2 нафар божхона хизмати ходими автоуловимни синчковлик билан текширди. Қатъий, лекин мулойимлик билан. Бунинг учун уларга плюс», — деб ёзади Фарҳод Сангинов.
Шунингдек, у Ўзбекистонда нарх-наво арзонлигини қайд этган: «Бир порция кабобда — учта сих. Тухум, ун, мандаринлар, нон — арзон».
Дам олиш кунлари Ўзбекистонга келган тожикистонликларнинг маҳсулотлар бу ерда мамлакатларига нисбатан анча арзонлиги ҳақидаги фикрлари ижтимоий тармоқларда асосий ўринни эгаллади, трендга айланди.
Меҳмонлар, шунингдек, Ўзбекистон фуқаролари томонидан кўрсатилган хушмуомалаликни алоҳида эътироф этди.
«Йигирма йилдан ортиқ вақт ичида бир-биримизни кўрмаган эдик, бир-биримиз ҳақида деярли ҳеч нарса билмас эдик. Энди худди ўртада нифоқ бўлмагандек учрашдик. Биз ҳақиқатан ҳам ўзбеклар билан биродарлармиз, минтақадаги энг яқин халқлармиз», — деб қайд этади ParvizXZ никли яна бир фойдаланувчи.
Улар қаторида Тожикистонга ташриф буюрган ўзбекистонликлар ҳам қўшнилар меҳмондўстлигидан хурсанд эканлигини яширмаган.
«Тожикистон халқига меҳмондорчилик учун раҳмат, — деб ёзади самарқандлик Нодир Аҳмедов. — Кеча Самарқанд тарафдан Душанбега автомобилимда бордим. ДАН ходимлари яхши ва хушмуомала. Қардош Тожикистон халқига меҳмоннавозлик учун миннатдорлик билдираман. Тожикистонда ҳеч қачон бўлмаганман, машинамда Душанбе, Панжикент шаҳарларини айландим, ҳаммаси аъло — муаммо йўқ. Ўзбек ва тожик халқига эҳтиромим! Президентларга раҳмат!»
Ўз навбатида, Facebook’даги Тожикистоннинг машҳур гуруҳларида ўзбекистонлик, Ўзбекистоннинг машҳур гуруҳларида эса тожикистонлик кўплаб янги иштирокчилар пайдо бўлди.
Ўзбекистонликлар қўшни юртдан келадиган меҳмонларга қўлидан келганча он-лайн кўмак беришга интилган. «Болалар, мана сизга Тошкент метроси харитаси», — деб фотосуратларни тақдим этган ўзбекистонлик Бобур Феникс.
Яна бир фойдаланувчи — Отабек Фатхуллаев эса Тошкентнинг қайси жойида овқатланиш мумкинлиги, Ўзбекистоннинг исталган банкида валюта айирбошлаш имконияти мавжудлиги, хусусан, долларнинг давлат курси ҳақида маълумот берган.
Айрим ўзбекистонликлар ёрдам керак бўлса деб ўз шахсий телефон рақамларини, тожикистонликлар эса бунга жавобан ўз рақамларини қолдирган.
«Самарқандга машинамда 79 ёшли бувимиз билан бордик, — деб ёзади Нодир Иброҳиов Facebook’даги саҳифасида. — У киши йўл бўйи жим кетди. Самарқанд бувимнинг Ватани, энди у ерга бошқа бора олмаслиги ҳақида кўп гапирардилар. Лекин бордилар. Орзуларини амалга оширган барчага раҳмат, биродар халқларимизга шон-шарафлар. Бундан буён доим шундай бўлаверсин».
