2017 йилнинг август ойида номаълум хакерлар Саудия Арабистонидаги нефть-кимё заводининг бошқарув тизимига ҳужум қилди. Ҳужумдан кутилган натижа нафақат компьютерлардан маълумотларни ўчириш ёки завод ишини тўхтатиш, балки портлашни келтириб чиқариш бўлган. Бу ҳақда The New York Times’га таяниб, TJournal хабар қилмоқда.
Киберхавфсизлик бўйича америкалик мутахассислар бундай ҳужумлар бошқа мамлакатларда ҳам такрорланиши мумкинлигидан хавотирга тушмоқда. Бунга минглаб саноат заводларининг худди шундай тизим билан жиҳозлангани сабаб бўлмоқда.
Мутахассисларни хавотирга солаётган нарса Triconex хавфсизлик тизими билан боғлиқ. Тизим заводдаги кучланиш, босим ва ўртача ҳароратни назорат қилади. Улар компаниянинг муҳандислик компьютерларидан бирида ғалати файлни топган. Файл Triconex’ни тартибга солувчига ўхшайди, аслида эса тизимни ишдан чиқарган. Аввалроқ бундай тизимни масофадан туриб бузишнинг иложи йўқ, деб ҳисобланар эди.
Тахмин қилинишича, мазкур ҳолат тизимни биринчи марта масофадан туриб ишдан чиқариш ҳолати ҳисобланади. Бундай тартибга солувчи тизимлар дунёдаги 18 мингдан ортиқ заводда, шу жумладан ядро, нефть, газ ва кимё ресурслари ишланадиган заводларда ўрнатилган.
Ҳужум вақтида хакерлар компьютерида юз берган хатолик заводни портлашдан қутқариб қолган. Бироқ хакерлар Саудия Арабистонидаги тизимни айланиб ўтиш йўлини топди, улар ҳужумни бошқа ихтиёрий мамлакатда такрорлаши мумкин.
Изоҳ (0)