Қирғизистон шимолини Ўзбекистон билан боғловчи «Бишкек—Ўш» трассасида яна қор кўчишлари кузатилди

Қирғизистонда мамлакатнинг шимолий ва жанубий вилоятларини бирлаштирувчи «Бишкек—Ўш» стратегик автотрассасида бир йўла учта катта ҳажмдаги қор уюми кўчиб тушди, деб ёзади «ТАСС» республика ФВВга таяниб.

Қор уюмлари автомобиль йўлининг 221, 222 ва 226-километрига қулаб тушган, аммо ҳеч ким жабрланмаган. Қор кўчкиларининг умумий ҳажми қарийб 3,3 минг кубометрга тенг. Воқеа жойида оғир техника ишлаб, қор уюмларини тозалаш билан шуғулланмоқда.

Қор кўчиши сабабли «Бишкек—Ўш» трассаси транспорт воситалари юриши учун ёпиқ бўлиб қолмоқда. Аввалроқ «Бишкек—Ўш» автомобиль йўлининг 246-километрида қор кўчиши туфайли, автомобиль йўли ёпилган эди.

Трасса бўйлаб жойлашган постларда 300 га яқин юк ва енгил машиналар тўпланиб қолгани айтилмоқда. Бу жойларда ҳайдовчилар ва йўловчилар учун исиниш пунктлари очилган, шунингдек, улар учун иссиқ овқатлар ташкил қилинган.

Бишкек—Ўш йўли Қирғизистоннинг шимолий қисмини Ўзбекистон билан ҳам боғлайди.