Бухоро вилояти ИИБга Қоракўл тумани «Қулбешкак — Ҳожиқозғон» чўл массивида юзага келган ёнғин оқибатида 4 нафар фуқаронинг жиддий жароҳат олганлиги тўғрисидаги хабар келиб тушди, деб хабар беради вилоят ИИБ матбуот хизмати.
Аниқланишича, 14 март куни соат тахминан 02:00 ларда, Қоракўл туман «Дўстлик» МФЙда яшовчи фуқаро Феруз Холмуродов, «Бандбоши» МФЙда яшовчи фуқаролар Муроджон Мардонов, Элёр Нуриллаев ҳамда Лазиз Раҳмонқуловлар Қоракўл туман «Учқир» заводига қарашли «Қулбешкак Ҳожиқўзғон» чўл массивининг 7-километрида жойлашган 426 сантиметр диаметрли газколлектор қувуридан яширин тарзда газконденсат маҳсулотларини ўғирлаш учун ушбу қувурни тешиб, ҳосил қилинган тешик орқали ўзлари билан олиб келган 65 метр узунликдаги резина шланг ёрдамида қувурдан сўриб чиқарилган газоконденсат маҳсулотини жамлаш ва тиндириш учун махсус ҳовуз қазган.
«Ҳовузга жамланган нефть ва газ маҳсулотларини елим идишларга жойлаштириш жараёнида тўсатдан юзага келган ёнғин, уларнинг жиноий ҳаракатларини охирига етказа олмай, жиддий куйишларига сабаб бўлган», — дейилади хабарда.
Ҳодиса содир бўлган жойда Элёр Нуриллаев ҳамда Феруз Холмуродовга тегишли бўлган УАЗ русумли автомашиналар тўлиқ ёнган ва ўзларининг ҳаракатларини ўзларига боғлиқ бўлмаган ҳолда охирига етказа олмай, нефть ва газ қувурларидан ўғрилик жиноятига суиқасд қилган, уларнинг барчаси турли даражадаги термик куйиш жароҳатларини олган.
Мазкур ҳолат юзасидан Феруз Холмуродов, Муроджон Мардонов, Элёр Нуриллаев ҳамда Лазиз Раҳмонқуловларга нисбатан Ўзбекистон Республикаси Жиноят Кодексининг 169-моддаси (ўғрилик) 3-қисми билан жиноят иши қўзғатилган.
Изоҳ (0)