Ўзбекистон ва АҚШ мудофаа вазирликлари ўртасидаги икки томонлама ҳарбий ҳамкорлик дастурига биноан мамлакат Қуролли Кучлар академиясига Вест-Пойнт (West Point) академиясининг бир гуруҳ ўқитувчи ва кадетлари ташриф буюрди. Бу ҳақда ЎзА хабар берди.
Вест-Пойнт номи билан ҳам машҳур бўлган АҚШ ҳарбий академияси ушбу мамлакат армиясининг энг қадимий олий федерал ҳарбий ўқув муассасаси ҳисобланади.
Саккиз кадет ва икки ўқитувчидан иборат жамоа Қуролли Кучлар академияси билан танишиш жараёнини ўқув даргоҳининг музейига ташрифдан бошлади. У ердаги экспозициялардан бирида меҳмонлар Вест-Пойнт тўғрисидаги китобни кўриб, ҳайратланди.
Қуролли Кучлар академиясининг Хитой халқ озодлик армияси, Бундесвер (Германия), Жанубий Корея армиясига бағишланган ўлкашунослик синфлари меҳмонларда катта таассурот қолдирди.
Кадетлар Қуролли Кучлар академиясининг умумқўшин факультети курсантлари билан суҳбатлашди. Тўртинчи курс курсантлари билан мулоқот қўшин танлаш имконияти, офицерлик хизмати билан боғлиқ мавзуда кечди.
Кадет Михаил Вондерер курсант Абдурасул Мусрепов билан рус тилида суҳбатлашди, курсант Аҳад Исмоилов эса меҳмонларнинг саволларига инглиз тилида жавоб берди. Бир сўз билан айтганда, суҳбат давомида таржимонга эҳтиёж сезилмади.
Изоҳ (0)