Ўзбекистон банк соҳаси расмийлари 2017 йил давомида пластик картадаги пулни нақдлаштириб берувчи банкоматлар масаласида бир неча бор деярли бир хил ваъда беришган эди: «Йил охиригача 1000 та банкомат ўрнатилади».
2017 йил январида Марказий банкнинг пул муомаласи департаменти вакили Фахриддин Бобоев йил охиригача Ўзбекистон бўйлаб 1000 та банкомат иш бошлаши ҳақида баёнот берган эди. Кейинроқ, 2017 йил февралида Марказий банкнинг Тошкент шаҳри бўйича бош бошқармаси бошлиғи Мажид Тоҳиров ҳам йил охиригача 1000 та банкомат ўрнатилиши, бу борада етказиб берувчилар билан музокаралар олиб борилаётганини айтиб ўтган эди.
Марказий банк 2018 йил 19 январь куни нақд пул муомаласи бўйича йиллик шарҳни тақдим этди. Унда 2017 йилнинг биргина декабрь ойида республика бўйлаб 159 та банкомат ўрнатилгани, 2018 йилнинг январь—март ойларида яна 150 та банкомат ўрнатилса, мамлакат бўйлаб ишлаб турган пулни нақдлаштирувчи банкоматлар сони 595 та етиши қайд этилган эди (оддий қилиб айтганда, 2018 йил 1 январь ҳолатига кўра Ўзбекистонда 445 та банкомат ўрнатилган).
Буни UzCard бош директори Аҳрор Маҳмудов ҳам тасдиқлади — унинг 2018 йил 14 март куни Spot нашрида эълон қилинган интервьюсига кўра, ҳозир Ўзбекистон бўйлаб 450 га яқин банкомат ўрнатилган. Кўринишидан, Маҳмудовдаги маълумотлар ҳам 1 январь ҳолатига кўра тўғри — биринчи чоракнинг сўнгги ойи ҳисобланган мартнинг ҳам қарийб ярми ўтиб бўлди, Марказий банк шарҳида таъкидланган 150 банкоматдан бирор ўнтаси ўрнатилган бўлиши мумкин. Масалан, «Дарё» мобил мухбири март ойи бошида Қарши давлат университети физика-математика факультети биносига пулни нақдлаштирувчи банкомат ўрнатилгани ҳақида хабар йўллаган эди.
Эътиборли томони, «йил охиригача 1000 та банкомат ўрнатамиз» ваъдасини бериш бу йил ҳам давом этмоқда. Масалан, ўша UzCard’нинг раҳбари Аҳрор Маҳмудов 2018 йил «охиригача банкоматлар сони яна мингтага кўпайиши»ни, уларнинг сони нафақат вилоят марказларида, балки узоқ туманларда ҳам каррасига ошишини таъкидлаган.
Шунингдек, февраль охирида Марказий банкнинг Валютани тартибга солиш ва тўлов баланси департаменти директори Бобир Абубакиров «2018 йил охиригача Ўзбекистонда 1045 та банкомат ўрнатилиши режалаштирилгани»ни маълум қилди. Қайд этиш жоизки, у айтган банкоматлар асосан туристлар учун — халқаро пластик карталарига хизмат кўрсатишга мўлжалланган ҳамда уларнинг ичида сўм ҳам, доллар ҳам бўлиши айтилмоқда.
Айтмоқчи, йил давомида 1000 та банкомат ўрнатилмаган бўлса-да, муҳими, ўрнатилган банкоматлар ишлади — 14 августдан Тошкент бозорларига ўрнатилган банкоматлар нақд пул «тарқата бошлади». Дастлабки ҳафталарда бир пластик картадан ечиб олиш мумкин бўлган нақд пул миқдори бир кунда фақат 100 минг сўм қилиб белгиланган эди, лекин ечилган пулдан фоиз олинмасди, банкоматли ҳудудлар эса шаҳарларнинг энг гавжум нуқталарига айланди.
Ҳозирга келиб вазият анча барқарор — банкоматлар олдида 2017 йил августидаги каби катта навбатлар деярли учрамайди, бир пластик картадан нақдлаштириш мумкин бўлган кунлик миқдор эса, хизмат кўрсатувчи банкка қараб, 500 минг сўмгача кўпайган — лекин энди «хизмат ҳақи»га расман фоиз ушлаб қолинмоқда.
Изоҳ (0)