Суриянинг Шарқий Гута туманидаги жангарилар гуманитар ёрдамлар эвазига тинч аҳолини қўйиб юборишга ваъда берди. Бу ҳақда Россия ахборот агентликларига таяниб, «РБК» хабар берди.
Суриядаги Россия келишув марказининг таъкидлашича, Қизил ярим ой жамиятининг гуманитар ёрдами Шарқий Гутага 5 март куни киришни режалаштирган.
Гуманитар ёрдам учун юборилган юк машиналарининг сони 45 та бўлиб, уларнинг таркибида мобил госпитал машиналари ҳам мавжуд. Уларга биринчи даражали эҳтиёж учун керак бўладиган 247 тонна озиқ-овқат маҳсулотлари ва дори-дармонлар ортилган.
Аввалроқ БМТ Хавфсизлик Кенгаши Сурияда 30 кунлик ярашув резолюциясини қабул қилганди. Бироқ биринчи куннинг ўзидаёқ гуманитар операциялар бузилган, тинч аҳоли Шарқий Гутани тарк эта олмаган. Суриядаги урушаётган томонларнинг яраштириш бўйича Россия маркази жангарилар ҳеч кимни озод қилмаганини ва Дамашқнинг шарқий қисмини бомбардимон қилишда давом этаётганликларини маълум қилди.
Reuters’нинг хабарларига кўра, аҳоли Сурия ҳукуматидан қўрққани учун кетишни истамаган.
Изоҳ (0)