Наманганда мактаб ўқувчиларининг «Ёш талантлар инновациялари» фестиваль-танлови бўлиб ўтди. Бу ҳақда «Дарё» мухбири хабар берди.
Вилоят халқ таълими бошқармаси, вилоят «Баркамол авлод» маркази ва «Болалар дунёси» газетаси таҳририяти ташаббуси билан ташкилланган тадбирда ўқувчилар ўзлари тайёрлаган авто ва авиаракета моделлари, электрон ўйинчоқлар, кемасозлик, робототехника намуналарини намойиш этди. Веб-сайтлар ва дастурлар, хорижий тиллар бўйича инновацион ишланмалар тақдим қилинди.
Танлов якуни бўйича 20 нафарга яқин ўқувчи махсус диплом ва қимматбаҳо совғалар билан тақдирланди. Жумладан, биринчи соҳиблари велосипед, иккинчи ўринни эгаллаганлар фотоаппарат ва учинчи ўринни қўлга киритганлар конструктор жамланмаси билан тақдирланди. Шунингдек, «Энг ёш фестиваль-танлов иштирокчиси» ва «Энг ноанъанавий инновация муаллифи» номинациялари бўйича ғолиблар ҳам мукофотланди.
Маълумот учун, бугунги кунда вилоятдаги 13 та «Баркамол авлод» марказида жами 300 дан ошиқ тўгарак фаолият кўрсатмоқда. Уларга 8 мингдан ортиқ ўқувчи жалб этилган.
Изоҳ (0)