Тошкент вилоятининг Зангиота туманидаги аёллар жазони ижро этиш муассасасида «Соғлом авлод учун» халқаро хайрия фонди томонидан 8 март – Халқаро хотин-қизлар куни муносабати билан байрам тадбири ўтказилди, деб хабар беради ЎзА.
Тадбир Ўзбекистон Президенти Шавкат Мирзиёевнинг 2018 йил 2 февралдаги «Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида»ги фармони ижроси доирасида ташкил этилди.
«Фонд томонидан тиббий-ижтимоий муассасалар, аҳолининг ижтимоий ҳимояга муҳтож қатламлари, меҳрибонлик, мурувват ва саховат уйлари, махсус мактаб-интернатлар тарбияланувчиларини қўллаб-қувватлаш мақсадида кенг кўламли ишлар амалга оширилмоқда. Бу борада фонд халқаро ташкилотлар билан самарали ҳамкорлик қилиб, турли ижтимоий лойиҳаларни ҳаётга татбиқ этмоқда. Бугунги байрам тадбири ҳам жазони ижро этиш муассасадаги аёлларнинг кўнглига илиқлик олиб кириш, уларни байрам муносабати билан табриклаш мақсадида ташкил этилди», — дейди «Соғлом авлод учун» халқаро хайрия фонди бўлим бошлиғи Фирдавс Холиқов.
Тадбир доирасида «Суғдиёна» халқ чолғулари миллий камер оркестрининг концерт дастури намойиш этилди.
Изоҳ (0)