Ўзбек—тожик чегарасидаги ўзгаришлар, ўқувчилар учун стипендия жорий этган андижонлик тадбиркор, Бобомурод Абдуллаевнинг суди санаси ва куннинг бошқа муҳим хабарлари

1 мартнинг эътиборга молик янгиликлари — «Дарё»нинг кечки дайжестида.

1. Конституциявий тузумга тажовуз қилишда айбланган Бобомурод Абдулланинг иши 5 март куни судда кўриб чиқилади. Бу ҳақда Олий суд матбуот хизмати маълум қилди.

2. Статистика қўмитаси: Ўзбекистонда февраль ойида товар ва хизматлар нархи ўртача 1,1 фоизга ошди. Озиқ-овқат маҳсулотлари 1,1, ноозиқ-овқат маҳсулотлари 1,3 ва хизматлар 0,7 фоизга қимматлади.

3. Бугун Ўзбекистон—Тожикистон давлат чегараси орқали 9 та ўтиш пунктлари тантанали равишда очилди. Хусусан, Самарқанд ва Сўғд вилояти ўртасидаги чегара пости ҳам очилди.

4. Ўзбекистонда йил охиригача 1000 дан зиёд янги банкомат ўрнатилади. Шунга ўхшаш ваъда ўтган йил бошида ҳам берилган эди.

5. «Ўзбекистон темир йўллари» Наврўз муносабати билан чегирмалар жорий қилади. Аввалроқ «Ўзбекистон ҳаво йўллари» ҳам Наврўз кунлари чегирмалар бўлишини эълон қилганди.

6. Тошкент аэропортида такси чақириш учун инфокиосклар ва кўп қаватли автотураргоҳ пайдо бўлади. Шунингдек, аэропортда иккинчи аэровокзал ишга туширилиши маълум қилинди.

7. Андижонлик тадбиркор Избоскан туманидаги мактабнинг аълочи ўқувчиларига стипендия жорий этди. Стипендия соҳиблари синф раҳбарларининг тавсиялари асосида мактабда тузилган ҳакамлар ҳайъати томонидан аниқланади.

8. Тошкентликлар ҳукуматга собиқ «Ўзбум» фабрикасини сақлаб қолиш учун Алишер Усмоновга мурожаат қилишни таклиф этди. Куни кеча «Ўзбум» сотувга қўйилгани ҳақида хабарлар чиққанди.

9. Даниялик архитектор Ян Гейл Тошкентнинг 8 та тумани учун бош режа тайёрлайди. У ўтган йили Тошкентда бўлиб, вазият билан танишиб кетган эди.

Бонусига: Президент маҳаллийлаштиришдаги кўзбўямачиликлар ҳақида гапирди. Бу иллат иссиқхоналар, томлар, болалар майдончаларида ҳам бор.