Статистика қўмитаси: Ўзбекистонда февраль ойида товар ва хизматлар нархи ўртача 1,1 фоизга ошди

Ўзбекистонда 2018 йилнинг февраль ойида товар ва хизматлар нархи ўртача 1,1 фоизга ошди. Бу ҳақда Давлат статистика қўмитаси маълум қилди.

Жумладан, озиқ-овқат маҳсулотлари 1,1, ноозиқ-овқат маҳсулотлари 1,3 ва хизматлар 0,7 фоизга қимматлади.

Мева маҳсулотларидан кўпроқ ўсиш олмада (6,1 фоиз), шунингдек, қуритилган меваларда (4,8 фоиз) кузатилди. Қовоқ бир ойда 10,0 фоизга қимматлади. Сабзавотлардан помидор 14,0, бодринг нархи 11,7 фоизга ўсди. Картошка ва пиёз нархларининг пасайиши кузатилди (мос равишда 2,7 ва 2,3 фоиз).Тухум ўртача 10,5, шакар 3,0, товуқ гўшти 1,3, қаттиқ пишлоқ ва қандолат маҳсулотлари 0,1 фоизга арзонлади.

Вилоятларда айрим озиқ-овқат маҳсулотларининг ўртача нархлари орасидаги тафавут сақланиб қолди. Жумладан, мол гўштининг (суяксиз гўштдан ташқари) ўртача 1 килограмми учун максимал нархи 36967 сўмни (Тошкент шаҳри), минимал нархи 29725 сўмни (Қорақалпоғистон Республикаси) ташкил этди. Суяксиз мол гўштининг ўртача 1 килограмми учун максимал нарх 44868 сўмни (Тошкент шаҳри), минимал нархи 39000 сўмга (Қорақалпоғистон Республикаси) тенг бўлди.

Вилоятлар орасида 1 килограмм. картошканинг максимал ва минимал ўртача нархлари ўртасидаги фарқ 1,2 баробарни (Қорақалпоғистонда 3843 сўм, Жиззах вилоятида эса 3272 сўм) ташкил этди. Ўнта тухумнинг максимал ўртача нархи 6655 сўм (Сирдарё вилояти), минимал ўртача нархи 5500 сўмга (Андижон вилояти) тўғри келди.

Ноозиқ-овқат маҳсулотлари нархлари ойда 1,3 фоизга кўтарилди. Қурилиш материаллари бўйича сезиларли даражада ғишт (29,3 фоиз), цемент (8,4 фоиз), шифер (5,9 фоиз) ва ёғоч маҳсулотлари нархи (3,3 фоиз) қимматлади.

Аҳоли учун хизматлар ойда ўртача 0,7 фоизга ошди. Хусусан, «Ўзбектелеком» АК томонидан аҳолига кўрсатилаётган алоқа хизматлари тарифлари кўтарилди. Маҳаллий телефон алоқаси учун абонент тўлови ўртача 27,7, шаҳарлараро ва халқаро сўзлашувлар ўртача 67,1 фоизга оширилди.

Йўловчи ташиш хизматларининг ошиши асосан шаҳарлараро йўналишда қатнайдиган поездларда чипта нархининг ўртача 31,9 ҳамда ҳаво транспорти хизматлари ўртача 2,8 фоизга кўтарилиши билан боғлиқ.