Тошкент шаҳридаги 19-мактаб ўқувчиси, 16 ёшли Бекзод Тўрахўжаев 2017 йилнинг сентябрида шифокорлар айби билан вафот этган. Бу ҳолат бўйича Жиноят ишлари бўйича Олмазор туман суди 2018 йил 27 февраль куни ҳукм чиқарди, дея хабар бермоқда UzNews.
Хабар беришларича, Бекзод Тўрахўжаев 2017 йил 15 сентябрь куни соат тахминан 23:00 атрофида қорни оғриётганидан шикоят қилган. Уни дастлаб шаҳар 1-сонли касалхонасига олиб боришган. У ерда Бекзодни қабул қила олишмаслигини, кўричак ёрилиши хавфи мавжудлиги сабаб, уни зудлик билан Тошкент тиббиёт академияси (ТошМИ-2)га олиб бориш кераклигини айтишган.
Шундан сўнг Бекзод зудлик билан ТошМИ-2га олиб борилган, у ерда шифокорлар бемор йигитни ўткир кўричак ташхиси билан болалар жарроҳлиги бўлимига даволаниш учун қабул қилган. Зудлик билан жарроҳлик ишларини бошлашга тайёргарлик кўрилган. Шундан сўнг 7:15 гача — бош шифокор ишга келгунича, ота-она фарзандининг аҳволидан бехабар қолган.
Бош шифокор 4:30 да операцияга олиб кириб кетилган Бекзод наркоз берилганидан сўнг, буни кўтара олмай, жон берганини, шифокорлар эса аллақачон иш жойидан кетиб бўлганини маълум қилган. Ота-она бу ҳолат устидан тегишли идораларга арз қилган, бунинг ортидан анестезиолог Шерзод Турсуновга нисбатан Жиноят кодексининг 116-моддаси 3-қисми билан жиноят иши очилган.
Бекзоднинг онаси Нодира Турсунова бу ҳолат юзасидан шундай дейди: «Анестезиолог ва хирургнинг айби билан болам оламдан ўтди. Мен бу инсонлар бошқа оналарнинг болаларини ҳам ўлдиришларига йўл қўймаслиги учун уларга нисбатан қонуний жазо кўрилишини хоҳлайман».
Изоҳ (0)